تالدىقورعاندا قۇقىق قورعاۋ قىزمەتىن كورسەتەتىن ورتالىق اشىلدى
مۇندا «ءبىر تەرەزە» قاعيداسى بويىنشا وبلىس تۇرعىندارىنىڭ ساپالى كومەك الۋىنا مۇمكىندىك جاسالعان.
ورتالىقتا جوعارى ساناتتى زاڭگەرلەر، ادۆوكاتتار، مەدياتورلار، نوتاريۋستار، پوليتسيا جانە پروباتسيا قىزمەتكەرلەرى ءتۇرلى كەڭەستەرىن بەرىپ، كومەگىن كورسەتەدى. جاڭا ورتالىقتىڭ اشىلۋىمەن ءوڭىر تۇرعىندارىن وبلىس اكىمى اماندىق باتالوۆ قۇتتىقتادى، - دەپ حابارلايدى الماتى وبلىسى اكىمىنىڭ باسپا ءسوز قىزمەتىنەن.
- مەملەكەت باسشىسى ن. ءا. نازاربايەۆ ءوز سوزىندە: «مەملەكەتتىك ورگاندار، سونىڭ ىشىندە قۇقىق قورعاۋ قىزمەتى جۇمىسىنىڭ تيىمدىلىگىن كورسەتەتىن باستى كورسەتكىشتەرىنىڭ ءبىرى - ونىڭ حالىق ءۇشىن اشىقتىعى جانە قولجەتىمدى بولۋى»، - دەپ اتاپ وتكەن بولاتىن. سول سەبەپتى، بۇگىن ءبىز وتە قاجەتتى شارانىڭ اشىلۋىنا كۋا بولىپ وتىرمىز. سىزدەرگە بۇگىننەن باستاپ قۇقىق قورعاۋ قىزمەتتەرى ورتالىعى كومەك كورسەتەتىن بولادى. ونىڭ جۇمىسى ازاماتتاردىڭ ارىز- شاعىمدارى مەن ءوتىنىش- تىلەكتەرىن جىلدام ءارى ساپالى قاراۋعا، اكىمشىلىك كەدەرگىلەردى بولدىرماۋعا جانە ازاماتتاردىڭ قۇقىق قورعاۋ، مەملەكەتتىك ورگاندارعا دەگەن سەنىمىن ارتتىرۋعا باعىتتالعان، - دەپ اتاپ ءوتتى ءوڭىر باسشىسى.
سالتاناتتى شارادا الماتى وبلىسىنىڭ پروكۋرورى ازامات جىلقىبايەۆ ءوز سوزىندە ورتالىقتى اشۋدىڭ ارقاسىندا ازاماتتارعا ەڭ قاجەتتى دەگەن سالا ماماندارى ءبىر عيماراتتا وتىرىپ، قاجەتتى كومەكتى كورسەتەتىن جانە بۇل قىزمەت ءتۇرى تۇتىنۋشىلار ءۇشىن وتە ىڭعايلى بولاتىندىعىن اتاپ ءوتتى. سونداي-اق وسى ورتالىقتىڭ اشىلۋىنا قولداۋ بىلدىرگەنى ءۇشىن وبلىس باسشىلىعىنا العىسىن بىلدىرگەن وبلىس پروكۋرورى، بۇگىننەن باستاپ ورتالىققا جۇگىنگەن ازاماتتار ساپالى قۇقىقتىق قىزمەتتى پايدالانۋعا تولىقتاي مۇمكىندىگى بارىن جەتكىزدى.
جاڭا عيماراتتىڭ لەنتاسىن قيۋ سالتاناتىنان كەيىن شاراعا قاتىسۋشىلار مەن قوناقتار ورتالىقتىڭ جۇمىسىمەن تانىسىپ شىقتى. مۇندا پروكۋرورلار مەن ىشكى ىستەر دەپارتامەنتى قىزمەتكەرلەرىنىڭ جۇمىس كابينەتتەرىنەن وزگە نوتاريۋس، ادۆوكات، مەدياتور، پسيحولوگ، ادىلەت جانە پروباتسيا قىزمەتى ماماندارىنىڭ جۇمىس كابينەتتەرى قاراستىرىلعان. بارلىق كەڭەس بەرۋ قىزمەتى - تەگىن. سونداي-اق بۇل جەردە پروكۋرورلار ازاماتتاردىڭ وتىنىشتەرىن قابىلداپ، ءتۇرلى ماسەلەلەردىڭ شەشىمىن تابۋعا باعىت-باعدار بەرىپ، جولىن كورسەتەتىن بولادى.
ەسكەرتە كەتەتىن بولساق، ورتالىق عيماراتىن قالپىنا كەلتىرۋ جانە قاجەتتى ارنايى قۇرال- جابدىقتارمەن قامتاماسىز ەتۋ ءۇشىن وبلىستىق بيۋدجەتتەن 47 ميلليون تەڭگە قاراجات بولىنگەن بولاتىن.
ورتالىقتا حالىققا ساپالى قىزمەت كورسەتۋ ءۇشىن بارلىق قاجەتتى جاعدايلار جاسالعان. اتاپ ايتقاندا، قابىرعالارى اينەكتەن تۇرعىزىلعان كابينەتتەر، كۇتۋشىلەرگە ارنالعان جايلى كۇتۋ ورىندارى، اۋديو جانە بەينە تىركەۋ قۇرىلعىلارى ورناتىلعان، كەلۋشىلەردى قاجەتتى اقپاراتتاردان قۇلاعدار ەتۋ ماقساتىندا ۇلكەن ەكراندار ورناتىلعان. سونىمەن قاتار ورتالىقتا بەينە بايلانىس ارقىلى ازاماتتاردىڭ وتىنىشتەرىن ءتيىستى ورگاندارعا جولداۋعا ارنالعان كابينەتتەر دە بار.
ورتالىقپەن تانىسۋدان كەيىن وبلىس اكىمى ا. باتالوۆ ورتالىق قىزمەتكەرلەرىنە حالىقتىڭ مۇددەسى ءۇشىن تابىستى ءارى جەمىستى ەڭبەك ەتۋلەرىن تىلەدى.
