سۋىق تيگەندە ءدارىسىز ەمدەلۋ جولى
«اۋىرىپ ەم ىزدەگەنشە، اۋىرمايتىن جول ىزدەڭىز» . الدىمەن، تاماقتانۋ تارتىبىنەن باستاڭىز. كوكونىستە، جەمىستەردە دارۋمەن كوپ بولعانىمەن، قازىر جەڭىل- جەلپى تاماقتاناتىن كەز ەمەس. كەپكەن جەمىستەر جەپ يممۋنيتەتىڭىزدى نىعايتىپ، ەت، ءسۇت ونىمدەرىن كوپتەپ جەڭىز. قار جاۋماي تۇرىپ كولىككە قىسقى دوڭگەلەك العانداي ەتىپ، سۋىق تيمەي تۇرىپ اعزاڭىزدى دا ينفەكتسياعا قارسى تۇرۋعا قارۋلاندىرىپ ءجۇرىڭىز. اۋرۋ تۋرالى ويلاماڭىز. ءسال تۇشكىرە باستاعاندا نە سۋىقتا ءجۇرىپ قالعاندا، ەرتەڭ اۋىرىپ قالاتىن شىعارمىن دەپ ويلاساڭىز، ءبىتتى. اۋرۋدى ءوزىڭىز- اق شاقىرىپ الدىڭىز. بۇل ءسوز سىزگە قيال- عاجايىپتاي كورىنەر، دەگەنمەن «اۋىرمايمىن» ، «مەنىڭ يممۋنيتەتىم ءالسىز ەمەس» دەپ ءوزىڭىزدى سەندىرىپ كورىڭىز، سوندا كوزىڭىز جەتەدى.
سۋىق تيۋ بەلگىلەرى اركىمدە ءارتۇرلى كورىنەدى، بايقاعان بويدا ونىمەن كۇرەستى باستاپ كەتىڭىز. ءبىر- اق كۇندە ەمدەلىپ، جازىلۋعا بولادى. اۋرۋدى جەڭدىرمەڭىز. مۇرنىڭىز ءبىتىپ، تۇماۋ بەلگىلەرى بىلىنسە، توسەككە جاتپاڭىز. بار كۇشىڭىزدى جيىپ، تازا اۋادا تىنىستاۋعا شىعىڭىز. توسەكتە جاتقان سايىن اۋرۋ كۇشەيە بەرەدى. ال باسىڭىز سولقىلداپ اۋىرسا، ءبىر ليموندى سىعىپ ءسولىن شىعارىپ، وعان ءبىر ستاقان ىستىق سۋ قوسىپ ءىشىڭىز. دوكتور موم نەمەسە كامفورا مايىن الىپ، شەكەگە، الاقانعا، تابانعا جاعىڭىز. مازگە قاراعاندا ماي تەردى جاقسى شىعارادى. سورپا قايناتىپ، قارا بۇرىش قوسىپ ىشسەڭىز دە بولادى. اجەلەردىڭ ادىسىمەن تەر شىعاراتىن شارالار جاساپ، قالىڭ كورپە جامىلىپ جاتىڭىز.
تۇرعان سوڭ قىزۋىڭىز بىردەن تۇسپەۋى مۇمكىن، باستىڭ سولقىلداعانى باسىلادى. 15-20 مينۋت سايىن جىلى سۋ ءىشىڭىز، بىرەر ساعات ىشىندە قىزۋىڭىز دا تۇسەدى. ال تاماعىڭىز اۋىرسا، ءبىر ليمون سىعىندىسىنا 100 گرامم بال قوسىپ ءىشىڭىز. ليمون مەن بال قوسىندىسى وتە ءدامدى بولادى، تاتىپ كورىڭىز. تاعى ءبىر ءادىسى سۋعا اس سوداسىن ەرىتىپ، وسى قوسپامەن تاماعىڭىزدى شايىڭىز. قاقىرىق كەلگەندە بىردەن شىعارىپ تاستاڭىز. جىلى كيىنىپ، ءوزىڭىزدى كۇتىڭىز، وقىرمان! ءسىز ءبىز ءۇشىن قىمباتسىز!
Massaget.kz
