بوزىمبايەۆ مۇناي ءداۋىرىنىڭ اياقتالۋىن بولجادى

«وزدەرىڭىز بىلەسىزدەر، 2030-2040 - جىلدارى باتىس ەۋروپا ەلدەرى مەن قىتاي ەلەكتروموبيلدەرگە كوشەتىندىگىن ايتۋدا. سوندىقتان الداعى 20 جىلدا جانار- جاعارماي رەتىندەگى وڭدەلگەن مۇناي ءوز باعاسىن اقتامايدى. ال ءبىز ءدال سول كەزەڭدە 100 ميلليون توننادان استام مۇنايدى وندىرەتىن بولامىز. باعا ءتيىمسىز بولسا، وندا ول ءونىمدى قاي جاققا جىبەرەمىز؟ ەڭ باستىسى پرەزيدەنتىمىز بەن ۇكىمەتىمىزدىڭ تاپسىرماسىنا سايكەس، مۇناي جانە گاز- حيميا سالاسىن دامىتاتىن بولامىز»، - دەدى بوزىمبايەۆ.

ونىڭ ايتۋىنشا، قازىردىڭ وزىندە بۇل باعىتتا جۇمىستار جۇرگىزىلۋ ۇستىندە. اتىراۋ وبلىسىندا ءتيىستى ەكونوميكالىق ايماق دامىتىلۋدا. اتالعان ايماقتىڭ ينفراقۇرىلىمىن «سامۇرۇق- قازىنا» ءال- اۋقات قورى ازىرلەۋ ۇستىندە.

«وعان 300 ميللياردتان استام قارجى سالىندى. تەمىرجول، سۋمەن قامتاماسىز ەتۋ، ەلەكتر جابدىقتارىن قامتاماسىز ەتۋ جانە ءتيىستى ەلەكتروستانسا سالۋ جۇمىستارى اتقارىلۋدا. ال ول جەردە قانداي جوبالاردى جۇزەگە اسىرامىز؟ بىرىنشىدەن، پوليپروپيلەن شىعاراتىن زاۋىت سالىنادى. وعان 2,5 ميللياردتان استام ينۆەستيتسيا سالىناتىن بولادى. ينۆەستيتسيا قىتاي بانكى تاراپىنان كەلەدى. بيىل ءبارى دۇرىس بولسا «سامۇرىق- قازىناعا» قاراستى كومپانيا سول جۇمىستاردى باستايدى. كەلەسى جىلدا پوليەتيلەن دەپ اتالاتىن تاعى ءبىر ۇلكەن جوبانى جۇزەگە اسىرۋ جوبامىزدا بار. ونى دۇنيەجۇزىندەگى ەڭ ءىرى 4 كومپانيانىڭ قاتارىنا كىرەتىن اۆستريالىق كومپانياسىمەن بىرگە جۇزەگە اسىرامىز دەپ جوسپارلاۋدامىز. الدىن الا كەلىسىم بار. كەلەسى جىلدىڭ ناۋرىز ايىندا ءتيىستى شەشىم قابىلدايتىن بولامىز. جوبانىڭ جالپى سوماسى 6,5 ميلليارد دوللاردان استام»، - دەدى قانات بوزىمبايەۆ.

سونىمەن قاتار ءمينيستردىڭ دەرەگىنشە، اتىراۋ ارنايى ەكونوميكالىق ايماعىندا جۇزەگە اسىرىلۋى مۇمكىن 5-6 جوبا ازىرلەنۋدە. قازىرگى ۋاقىتتا ولارعا ينۆەستور ىزدەۋ جۇمىستارى جۇرگىزىلىپ جاتىر.

اۆتور: مارلان جيەمباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى