بوزىمبايەۆ تەڭىزدىڭ وندىرىستىك قۋاتتىلىعىن ارتتىرۋداعى قازاقستاننىڭ ۇلەسىن اتادى

بۇل تۋرالى بۇگىن ەلوردادا ءوتىپ جاتقان «Kazakhstan Global Investment Roundtable»  فورۋمى اياسىندا ب ا ق وكىلدەرىنە سۇحبات بەرگەن ق ر ەنەرگەتيكا ءمينيسترى قانات بوزىمبايەۆ ايتتى،

دەپ حابارلايدى قازاقپارات.

 «ەنەرگەتيكا سالاسىنا ينۆەستيتسيا تارتۋ قارقىندى ءجۇرىپ جاتىر. ەڭ باستىسى جالپى قۇنى 37 ميلليارد دوللاردى قۇرايتىن تەڭىز كەن ورنىن كەڭەيتۋ جوباسى بار. اتالعان قارجىنىڭ ءبىراز بولىگى اتىراۋ وبلىسىنا قۇيىلىپ جاتىر. 27 مىڭ ادام سول جوبادا جۇمىس ىستەۋدە. الەمنىڭ 100-دەن استام كومپانياسى قاتىسۋدا»، - دەدى ول.

 وسى رەتتە مينيستر كەن ورنىن كەڭەيتۋ بارىسىنداعى قۇرىلىس جۇمىستارىندا دا، بۇرعىلاۋ جۇمىستارىندا دا قازاقستاندىق ۇلەستىڭ جوعارى بولاتىندىعىن ايتتى.

«قۇرىلىس جۇمىستارىنداعى قازاقستاندىق كومپانيالاردىڭ ۇلەسى 60 پايىزعا جاقىن بولادى. ال بۇرعىلاۋ جۇمىستارىنداعى ۇلەسىمىز 50 پايىزدان اسىپ جىعىلادى. جالپى جوباداعى قازاقستاندىق ۇلەس 35-36 پايىزدى قۇرايدى»، - دەدى قانات بوزىمبايەۆ.

ەسكە سالا كەتەيىك، 2016 -جىلدىڭ 5 - شىلدەسىندە «تەڭىزشيەۆرويل» ج ش س باتىس قازاقستاندا ورنالاسقان تەڭىز كەن ورنىنىڭ وندىرىستىك قۋاتتىلىعىن ارتتىرۋدىڭ كەلەسى ساتىسى بولىپ تابىلاتىن كەلەشەك كەڭەيۋ جوباسى مەن ۇڭعى ەرنەۋىندەگى قىسىمدى باسقارۋ جوباسىن قارجىلاندىرۋعا قاتىستى اقىرعى شەشىمنىڭ قابىلدانعانىن حابارلاعان بولاتىن.

اۆتور: مارلان جيەمباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى