مۇناي باعاسىنىڭ تومەندەۋى ۇنەمدەۋگە ۇيرەتتى - ساعىنتايەۆ
بۇل پىكىردى بۇگىن ەلوردادا ءوتىپ جاتقان «Kazakhstan Global Investment Roundtable» فورۋمىندا ق ر پرەمەر- ءمينيسترى باقىتجان ساعىنتايەۆ ءبىلدىردى، دەپ حابارلايدى قازاقپارات.
«بۇگىندە بيۋدجەتتىڭ 43 پايىزى شيكىزاتتىق سەكتور تۇسىمدەرىنەن قالىپتاسادى. ەگەر دە مۇنان ارى دا ءدال وسى باعىتتى ۇستانا بەرسەك، وندا ەل پرەزيدەنتى الدىمىزعا قويعان ماقساتتارعا جەتە الماسىمىز تۇسىنىكتى. وسىناۋ شيكىزاتتىق سالاعا دا تەحنولوگيالىق جاڭعىرتۋ جۇرگىزىپ، شىعىنداردى تومەندەتۋىمىز، ءتىپتى قازىرگىدەي باعا بولىپ تۇرعاننىڭ وزىندە مول كىرىس الۋىمىز قاجەت. مۇناي باررەلى 100 دوللاردان اسقان كەزدە بىزدىكى ءبىرىڭعاي شىعىستار ەدى. بۇگىندە باعا 60 دوللار توڭىرەگىندە. دەگەنمەن ءبىز 40 دوللار بولعاندا دا ءومىر سۇردىك. بيۋدجەتتەن ارتىق شىعىستارىمىزدى الىپ تاستادىق جانە بۇل بىزگە كوپ دۇنيەنى ۇيرەتتى»، - دەدى ول.
سونىمەن قاتار ۇكىمەت باسشىسى قازاقستان شيكىزاتتىق باسىمدىعىنان باس تارتپايتىندىعىن تاعى ءبىر مارتە ايتتى.
«ءبىز قۇداي بەرگەن باسىمدىقتى جوعالتقىمىز كەلمەيدى. ءبىراق، سونىمەن قاتار باسەكەگە قابىلەتتىلىك تە ارتا ءتۇسۋى قاجەت. ەكىنشى جاعىنان الەمنىڭ دامىعان 30 ەلىنىڭ قاتارىنا قوسىلۋ ءۇشىن ەكونوميكا ءوسىمىن 6-7 پايىز كولەمىنە جەتكىزەمىز دەسەك، وندا ەكونوميكامىزدىڭ ءوسىم درايۆەرى بولاتىن جاڭا سالالار دا قاجەت. ال بۇل جەردە ازىرلەمەلەر مەن جاڭا تەحنولوگيالارسىز ەشقايدا بارا المايسىڭ»، - دەدى پرەمەر- مينيستر.
باقىتجان ساعىنتايەۆتىڭ ايتۋىنشا، ەگەر بۇرىنىراق بيزنەس عىلىمي ازىرلەمەلەرگە ينۆەستيتسيا سالۋعا قۇلىقسىز بولسا، قازىرگى ۋاقىتتا ولاردىڭ تارابىنان قىزىعۋشىلىق ارتىپ كەلەدى.
«بۇگىندە عىلىمي ازىرلەمەلەرگە سۇرانىس ارتىپ كەلەدى. ەگەر بۇرىنىراق، وعان ەشكىم قاراماسا، قازىرگى ۋاقىتتا ۇلكەن قاجەتتىلىك تۋىنداپ وتىر. ءبىز مۇنى كورىپ وتىرمىز جانە وسى باعىتتا جۇمىس ىستەۋدەمىز»، - دەدى ول.
اۆتور: مارلان جيەمباي
