قاراعاندىدا سويلەيتىن باعدارشام پايدا بولدى

جولدىڭ ادام كوپ وتەتىن بولىگىنە ورناتىلعان باعدارشامنىڭ پايداسى كوپ، دەپ جازادى Baq.kz اگەنتتىگىنىڭ ايماقتاعى ءتىلشىسى.

45 ورامدا ورناتىلعان باعدارشام جاياۋ جۇرگىنشىلەرگە جاسىل ءتۇستى سيگنالدىڭ جانعانىن ايتىپ، حابار بەرەدى. بۇل جاڭاشىلدىق كوزى ناشار كورەتىن نەمەسە ءتىپتى كورمەيتىن ادامدارعا ارنالعان.

«ارنايى باعدارشام ساتىپ الۋدىڭ قاجەتى جوق. ولار سويلەۋى ءۇشىن جۇمىس ىستەپ تۇرعان باعدارشامدارعا سويلەۋشى- اقپاراتشى ورناتىلادى» ، - دەيدى كوممۋنالدىق شارۋاشىلىق، جولاۋشىلار تاسىمالى جانە اۆتوموبيل جولدارى ءبولىمى باسشىسىنىڭ مىندەتىن اتقارۋشى ەسكەندىر قابيدوللا.

قاراعاندىلىقتار بولسا جاڭاشىلدىققا ءدان ريزا.

«ءبىز سياقتى مۇگەدەكتەرگە جاعداي جاسالىپ جاتقاندا ارينە قۋانامىز. ءوزىم وسى 45 ورامدا تۇرامىن. كوزىم كورمەيدى. جولدى كەسىپ وتەردە تۇرعىنداردان كومەك سۇرايتىن ەدىم. ەندى سويلەيتىن باعدارشامنىڭ ارقاسىندا ءوزىم وتەتىن بولدىم» ، - دەيدى قالا تۇرعىنى يبراگيم اسىلوۆ.

كوممۋنالدىق شارۋاشىلىق، جولاۋشىلار تاسىمالى جانە اۆتوموبيل جولدارى ءبولىمى باسشىسىنىڭ مىندەتىن اتقارۋشى ەسكەندىر قابيدوللانىڭ ايتۋىنشا، سويلەيتىن باعدارشام قالانىڭ ازىرگە ءبىر جەرىندە جۇمىس ىستەپ تۇر. باعدارشام جۇمىسى تيىمدىلىگىن كورسەتسە باسقا دا جەرلەرگە ورناتىلاتىن بولادى.

«سويلەۋشى- اقپاراتشى باعدارشام ءوزىن جاقسى جاعىنان كورسەتسە قالانىڭ ادامدار كوپ جۇرەتىن جەرلەرىنە ورناتاتىن بولامىز. مۇنداي ءبىر باعدارشامنىڭ قۇنى 240 مىڭ 176 تەڭگە» ، - دەيدى ە. قابيدوللا.

جىبەك مۇقاشەۆا 

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى