ماجىلىسمەن قازاقستاننىڭ كيەلى جەرلەرىن ۇلتتىق ۆاليۋتالارعا ەنگىزۋدى ۇسىندى

دەپۋتات مادەني مۇراعا جاتاتىن تاريحي ەسكەرتكىشتەر مەن ۇلتتىق قۇندىلىقتاردى ناسيحاتتاۋدىڭ ءتۇرلى جولدارى بار ەكەنىن اتاپ ءوتتى جانە ۇلتتىق ۆاليۋتادا تاڭبالاناتىن بەينەلەردىڭ اسا ماڭىزدىلىعىن باسا ايتتى.

 «تاياۋدا عانا الەۋمەتتىك جەلىلەردە، ەل اراسىندا جانە اقپاراتتىق قۇرالداردا ۇلتتىق بانك تانىستىرعان جاڭا 500 تەڭگەلىك بانكنوتقا قاتىستى قىزۋ پىكىرتالاستار ءجۇردى. بۇل رەتتە، جاڭا 500 تەڭگەگە كەسكىندەلگەن ەلورداداعى «موسكۆا» كوممەرتسيالىق بيزنەس- ورتالىعىنىڭ بۇكىل قازاقستان ءۇشىن ەش ىزگى سيمۆولدىق ءمانىسى جوقتىعى ءسوزسىز. شىنداپ كەلگەندە، الەم بويىنشا ۇلتتىق ۆاليۋتادا تاڭبالاناتىن بەينە سيمۆولدىق مانگە يە بولىپ تابىلادى. سوندىقتان، وعان قوعام دا، ورتالىق بانكتەر دە بەي- جاي قارامايدى. مۇنى دامىعان ەلدەر تاجىريبەسىنەن دە بايقاۋعا بولادى. ءتىپتى، كورشى رەسەيدىڭ ءوزى بيىل اينالىمعا تۇسەتىن 200 جانە 2000 رۋبلدىڭ جاڭا بانكنوتتارىندا نە كەسكىندەلەتىنىن ءبۇتىن رەسەي بويىنشا جۇرگىزىلەتىن اشىق داۋىس بەرۋ ارقىلى تاڭداپ الدى. سوندىقتان، ۇلتتىق ۆاليۋتامىزدا نە بەينەلەنەتىنىن جالعىز ۇلتتىق بانك ديزاينەرلەرىنىڭ جەكە تاڭداۋىنا عانا تاستاماي، قوعامدىق تالقىعا شىعارۋىمىز قاجەت»، - دەدى باقىتبەك سماعۇل ماجىلىستە وتكەن ۇكىمەت ساعاتىندا.

سونداي- اق دەپۋتات ەلباسى جاريالاعان «رۋحاني جاڭعىرۋ» ستراتەگياسىنىڭ ۇلتتىق ۆاليۋتادا دا كورىنىس بەرۋى قاجەتتىگىن، تەڭگە جازۋلارىن لاتىن گرافيكاسىنا اۋىستىرۋمەن عانا شەكتەلمەۋى كەرەكتىگىن اتاپ ءوتتى.

«ۇلتتىق ۆاليۋتادا بارشا قازاقستاندىقتار جانە كۇللى تۇركى دۇنيەسى قاسيەت تۇتاتىن كيەلى جەرلەر كورىنىس تاپقانى ابزال. ولاردى الىستان ىزدەۋدىڭ نەمەسە ينتەرنەتتەن قاراۋدىڭ قاجەتى جوق. بارلىق اقپاراتتار مەن دەرەكتەر «رۋحاني جاڭعىرۋ» اياسىندا قولعا الىنعان «قازاقستاننىڭ كيەلى جەرلەرى» جوباسى اياسىندا جيناقتالۋدا. قازىردىڭ وزىندە عالىمدار مەن قوعامدىق قايراتكەرلەر 100 جالپى ۇلتتىق جانە 500 وڭىرلىك مادەني ەسكەرتكىشتەردى ىرىكتەپ الدى»، - دەدى ول.

وسىلايشا، باقىتبەك سماعۇل تاڭداۋلى كيەلى ورىنداردى ۇلتتىق ۆاليۋتادا بەينەلەۋ ارقىلى ولاردى بارشا قازاقستان حالقىنا، جاس ۇرپاققا، شەتەلدىك تۋريستەرگە جانە جاھاندىق كوللەكسيونەرلەر اراسىندا ناسيحاتتاۋدى ۇسىندى.

اۆتور: ايجان سەرىكجان قىزى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى