كونفەدەراتسيا كۋبوگى: قاي وبلىس توپ جاردى؟

سپورتتىڭ التى ءتۇرى بوكس، گرەك-ريم، ەركىن، دزيۋدو جانە قازاق كۇرەسىنەن، سونداي-اق، تاەكۆوندودان سايىسقا تۇسكەن ءار ءوڭىر سپورتشىلارى ءوزارا كىل مىقتىلاردى انىقتادى.

ەندى وسى سپورت تۇرلەرى بويىنشا قاي وبلىس سپورتشىلارى جەڭىمپاز بولعانىنا توقتالايىق.

بوكس:

بوكستان وڭتۇستىك قازاقستان وبلىسىنىڭ بىلعارى قولعاپ شەبەرلەرى توپ جاردى. ولار فينالدا ماڭعىستاۋ وبلىسىنىڭ كومانداسىن 7:3 ەسەبىمەن ۇتىپ، كونفەدەراتسيا كۋبوگىنىڭ يەگەرى اتاندى.

گرەك-ريم كۇرەسى:

گرەك-ريم كۇرەسى بويىنشا الماتى وبلىسى باس جۇلدەنى جەڭىپ الدى. ولار فينالدا قاراعاندى وبلىسىنىڭ سپورتشىلارىن 5:3 ەسەبىمەن قاپى قالدىردى.

ەركىن كۇرەس:

ەركىن كۇرەستەن الماتى وبلىسىنىڭ بالۋاندارى كونفەدەراتسيا كۋبوگىن قانجىعالارىنا بايلادى. ولار فينالدا شىعىس قازاقستان وبلىستارىنىڭ بالۋاندارىمەن 4:4 ەسەبىمەن تەڭ تۇسكەن بولاتىن. الايدا، ۇيىمداستىرۋشىلار تەڭ ناتيجەنىڭ جەڭىمپازدارىن ەكى وبلىستان كەلگەن بالۋانداردىڭ كۇرەسۋ مانەرى مەن ءادىس جاساۋ ساپاسى بويىنشا باعالاپ، 42:40 ەسەبىمەن الماتى وبلىسىنىڭ بالۋاندارىن ۇزدىك دەپ تاپتى.

دزيۋدو:

دزيۋدو كۇرەسىنەن قاراعاندى وبلىسىنىڭ بالۋاندارى مىقتى ەكەندەرىن دالەلدەدى. ولار فينالدا اقتوبە وبلىسىنىڭ بالۋاندارىن 4:1 ەسەبىمەن ويسىراتا جەڭدى.

تاەكۆوندو:

تاەكۆوندو سپورتى بويىنشا الماتى قالاسىنىڭ سپورتشىلارى ۇزدىك ەكەنىن مويىنداتتى. ولار فينالدا الماتى وبلىسىنان كەلگەن قارسىلاستارىن 72:42 ەسەبىمەن ۇتىپ، كونفەدەراتسيا كۋبوگىن قانجىعالارىنا بايلادى.

قازاق كۇرەسى:

كونفەدەراتسيا كۋبوگىنا بيىل تۇڭعىش رەت قوسىلعان قازاق كۇرەسىنەن «الماتى قالاسىنىڭ سپورت كلۋبى» جەڭىمپاز اتاندى. ولار فينالدا «قاراعاندى وبلىسىنىڭ سپورت كلۋبىن» 5:3 ەسەبىمەن ۇتىپ، جەڭىمپاز اتاندى.

وسىلايشا سپورتتىڭ 6 تۇرىنەن وتكەن كونفەدەراتسيا كۋبوگى ءوزارا مىقتىلاردى انىقتادى. سپورتتىڭ ءار تۇرىنەن جەڭىمپاز اتانعان كوماندالارعا 25 ميلليون تەڭگەدەن قارجىلاي سىياقى تابىستالدى.

اۆتور: كۇنسۇلتان وتارباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى