پاۆلودارلىق وقۋشى سىرىڭكەدەن ياساۋيدىڭ كەسەنەسىن قۇراستىردى - فوتو
شىعارماشىلىق پەن قولونەر شەبەرلەرىنىڭ فەستيۆالىندە كەسكىندەمە، توقىما، اپپليكاتسيا، جۇنمەن جۇمىس جاساۋ، قاعاز ونەرى، كەستە، كۆيللينگ، پەيپ- ارت، تىگۋ، اعاش كەسۋ، مەتاللدى كوركەم وڭدەۋ، تابيعي جانە قالدىقتارمەن وڭدەۋ سياقتى 63 جۇمىس ۇسىنىلدى.
بۇل كۇنى قاتىسۋشىلار سايىسكەرلەردىڭ تاڭعاجايىپ شىعارماشىلىق جۇمىستارى ارقىلى قازاق حالقىنىڭ مادەنيەتىمەن جانە داستۇرلەرىمەن تانىستى. بايقاۋعا قوسىمشا ءبىلىم بەرۋ ۇيىمدارىنان، جالپى ءبىلىم بەرۋ مەكتەپتەرىنىڭ وقۋشىلارى مەن بالالار قولونەر شىعارماشىلىق بايقاۋىنىڭ جەڭىمپازدارى قاتىستى. ەكىباستۇز قالاسىنىڭ وقۋشىلارى فەستيۆالدە بەلسەندىلىك تانىتىپ، بايقاۋعا 22 جۇمىس اكەلدى.
ال قالعان قاتىسۋشىلار پاۆلودار، اقسۋ قالاسى مەن باياناۋىل جانە ماي اۋداندارىنان كەلگەن. 7-18 جاس ارالىعىنداعى وقۋشىلار قازىلار القاسىنا وزدەرىنىڭ تاڭعاجايىپ جۇمىستارىن دايىنداپ اكەلدى. قازىلار القاسى ءۇش نوميناتسيا بويىنشا جەڭىمپازداردى انىقتادى. «بەينەلەۋ ونەرى» نوميناتسياسىمەن كىشى جاس ەرەكشەلىك كاتەگورياسى بويىنشا ەكىباستۇز قالاسىنان كەلگەن دانيار ەسكەلدييەۆ «مەنىڭ الەمىم» سۋرەتىمەن ءبىرىنشى ورىندى جەڭىپ الدى. ورتا جاس ەرەكشەلىك كاتەگورياسى بويىنشا پاۆلودار قالاسىنان «استانا - 2050» جۇمىسىمەن ساميرا امانگەلدى ۇزدىك اتاندى.
«ساندىك- قولدانبالى شىعارماشىلىق» نوميناتسياسى بويىنشا كىشى جاس ەرەكشەلىك ساناتىندا №9 -مەكتەپ - گيمنازياسىنىڭ وقۋشىسى داريا كۋزمينا قاعازدان «سۋ الەمى استىندا» جۇمىسىمەن ەرەكشە كوزگە ءتۇستى. ورتا جاس ساناتىندا ەكىباستۇز قالاسىنان كسەنيا ۆولكوۆا «كۇي شەرتكەن دومبىرا» اتتى جۇمىسىمەن جەڭىمپاز اتاندى. جوعارعى ساناتتاعى قاتىسۋشىلاردان ءبىرىنشى ورىنعا قول جەتكىزگەن ەكىباستۇز قالاسىنان «ۇلتتىق اشەكەيلەرى» اتتى اپپليكاتسيا جۇمىسىمەن سابينا كولۋمبايەۆا بولدى.
«كوركەم قولونەرى» اتتى نوميناتسيا بويىنشا جەڭىمپاز اتانعاندار: كىشى جاس ەرەكشەلىك ساناتىندا ەكىباستۇز قالاسىنان - ارايلىم كاريموۆا، ورتا جانە جوعارعى توپتان اقسۋ قالاسى، قىزىلجار مەكتەبىنەن تەمىرلان قاليەۆ جانە سۇلتان جۋتايەۆ بولدى. ارايلىم كاپروننان گۇلدەر جاساسا، تەمىرلان - سىرىڭكەدەن كەسەنە جاسادى، ال سۇلتان مەتالدان قىران جاساپ بارشا جۇرتتى تاڭ قالدىردى.
«بۇل كەسەنە ەكى جىلدا ازىرلەنىپ، 1360 قوراپ پايدالانىلدى. بۇدان باسقا، تەمىردەن قىران بۇركىت جاسادىق. بۇل وتە قۇردەلى جۇمىس. شىدامدىلىقتى تالاپ ەتەدى. ءوزىمىزدىڭ «شەبەر قولدار» ۇيىرمەمىز بار. جۇمىستاردىڭ بارلىعى وتە كەرەمەت»، - دەيدى اقسۋ قالاسى قىزىلجار ورتا مەكتەبىنىڭ ۇستازى اسقار اقانوۆ.
