شىمكەنتتە العاش رەت «دوستىق كوكپارى» ۇيىمداستىرىلدى
ءتۇرلى ۇلت وكىلدەرى جاستارىنىڭ باسىن قوسقان ۇلتتىق ويىننىڭ وتۋىنە وبلىستىق قازاقستان حالقى اسسامبلەياسى مەن وبلىس اكىمدىگىنە قاراستى «قوعامدىق كەلىسىم» مەكەمەسى مۇرىندىق بولدى، دەپ حابارلايدى قازاقپارات ءتىلشىسى.
ماقتاارال اۋدانىندا وتكەن ۇلتتىق ويىنعا ەلۋدەن استام شاباندوز قاتىستى. ۇلتتىق قۇندىلىقتاردى ناسيحاتتاۋ ءارى جاستار اراسىندا دوستىقتى نىعايتۋ ماقساتىندا وتكەن شارانىڭ اشىلۋ سالتاناتىندا ماقتاارال اۋدانىنىڭ اكىمى عالىم يسمايلوۆ پەن «قوعامدىق كەلىسىم» مەكەمەسىنىڭ باسشىلارى ءسوز سويلەپ، شاباندوزدارعا ساتتىلىك تىلەدى.
«وڭتۇستىكتىڭ جاستارى اراسىندا بۇرىن-سوڭدى مۇنداي «دوستىق كوكپارى» وتپەگەن. جارىسقا ءتۇرلى ەتنوس جاستارى قاتىسىپ وتىر. بۇل ويىن سالاۋاتتى ءومىر سالتىن قالىپتاستىرۋمەن قاتار، جاستاردىڭ ءوزارا تاتۋلىق پەن ىنتىماعىن ارتتىرادى. ۇلتتىق سپورتتى ۇلىقتاۋعا ارنالعان شارالار الداعى ۋاقىتتا دا جالعاسادى دەپ سەنەمىن»، - دەدى ماقتارال اۋدانىنىڭ اكىمى عالىم يسمايلوۆ.
كوكپاردا «ىنتىماق»، «بىرلىك»، «دوستىق»، «بايشۇبار» دەپ اتالاتىن ءتورت كوماندانىڭ ات قۇلاعىندا ويناعان بالۋان جىگىتتەرى باس جۇلدەنى جەڭىپ الۋ ءۇشىن بارىن سالدى. تارتىستى ويىننان ەرەكشە اسەر العان كوپشىلىك جارىستى سوڭىنا دەيىن تاپجىلماي تاماشالادى. ويىن سوڭىندا جەڭىمپازدار مەن جۇلدەگەرلەرگە ۇيىمداستىرۋشىلار تاراپىنان ديپلوم جانە قارجىلاي سىياقى تابىس ەتىلدى. سونىمەن قاتار، ويىن بارىسىندا ەپتىلىگىمەن كوزگە تۇسكەن شاباندوزدار دا ارنايى نوميناتسيالارمەن ماراپاتتالدى.
