ءشىمان اپا ەسترادا انشىلەرىنىڭ بەتپەردەسىن اشىپ، وتىرىكتەرىن جايىپ سالدى
كەمپىردىڭ كەيپىنە ەنگەن اكتەردى جەلىدەگىلەر جەردەن الىپ، جەرگە سالاتىن بولعان. ءتىپتى، ايەلشە كيىنگەن ونەر يەسىن كىنالايتىنداردىڭ قاراسى كۇن ساناپ ارتىپ، جاعىمسىز پىكىرلەردى قارشا بوراتادى ەكەن. تىلشىگە ەكسكليۋزيۆتى سۇحبات بەرگەن اكتەر ەربولات كوپشىلىكتىڭ سىنىنا جاۋاپ بەرۋدى ءجون دەپ شەشتى.
«ەر ادام ايەل ادامنىڭ وبرازىن سومداعىش بولىپ كەتتى دەپ سىنايدى عوي. بۇل جەردە «ونەر» دەگەن ءسوز بار. سونى باياعىدا ايتاتىن بولسا، قۇدايبەرگەن سۇلتانبايەۆقا نەگە ايتپادى؟ قازىر كۇلپاش پەن ءشىمان شىعىپ ەدى، ءبارى سوعان سويلەپ، ءبارى بىلگىش، ءبارى ايتقىش بولىپ كەتتى. ينتەرنەتتە دە ايتادى. قازىر ادامدار ويىنا كەلگەنىن ايتاتىن بولىپ كەتتى عوي. ايتقان ادام ايتسا ايتا بەرسىن. ءبىراق مەن كەمپىردىڭ كيىمىن ءومىر باقي كيىپ جۇرگەن جوقپىن. ول ساحناعا 15 مينۋتقا كيىلەتىن وبراز»، - دەيدى ءشىمان اپانىڭ وبرازىنداعى اكتەر.
ءشىمان اپاعا ايتىلعان سىنداردىڭ سانى مۇنىمەن شەكتەلمەيدى. ايتپاقشى، سوڭعى كەزدەرى كەمپىردىڭ كەيپىنە ەنگەن اكتەر انشىلىك قابىلەتىن دە كوپشىلىككە بايقاتىپ ءجۇر. ونەر يەسىنىڭ بۇل قادامىنا كەرەعار پىكىر جازاتىندار دا جەتەرلىك ەكەن. الايدا، ازىلمەن ءان ونەرىن قاتار الىپ جۇرگەن ەربولات وتاندىق ەستراداداعى انشىلەردىڭ بەتپەردەسىن اشتى.
«مىسالى، مەن اكتەر بولىپ ءجۇرىپ، «ەلەكتريك» بولىپ جاتقان جوقپىن عوي. سوندىقتان مەن ونەردە ءجۇرمىن. كەيبىر انشىلەر بار مەن بىلەتىن «ۆوكال» ساباعىن كورمەگەن. ونىڭ ىشىندە بىزدەر كوردىك قوي، 4 جىل ۆوكال وقىدىق قوي. مەن شىرقاعان اندەر «وبرازداعى اندەر» عوي. مەن ديماش قۇدايبەرگەنگە ۇقساپ ءبىر كونكۋرستارعا قاتىسىپ، داۋىسىمدى كورسەتىپ جاتقان جوقپىن عوي. مەن ايتىپ جاتقان جوقپىن مىقتى ءانشىمىن دەپ. بىزدە نەشە ءتۇرلى انشىلەر بار. ستۋدياعا بارىپ 30 دۋبل جازاتىن»، - دەيدى ەربولات تولەگەنوۆ.
سوندىقتان، ەربولات تولەگەنوۆ سىناپ، مىنەگەندەردىڭ سوزىنەن شىڭدالاتىنىن ايتادى. بۇگىندە ءشىمان اپانىڭ ونەردەگى ۇستانىمى «ءيت ۇرەدى، كەرۋەن كوشەدىمەن» پارا- پار بولىپ وتىر.
«بىرەۋدىڭ اۋزىنا قاقپاق بولمايمىن عوي. سىن تۇزەلمەي، ءمىن تۇزەلمەيدى. سىن بولۋى كەرەك. سىن بولماسا ەشكىم ەمەسسىڭ، جالپى. سەنىڭ ونەرىڭنىڭ العا باسپاعانى. العا باسقاننان كەيىن سىنايتىن ادامدار بولادى. سىندى كوتەرە ءبىلۋ كەرەك. ت. جۇرگەنوۆ اتىنداعى ونەر اكادەمياسىن وقىعان كەزدە بىزگە ايتاتىن «سىنعا، سىناققا دايىن بولىڭدار» دەيتىن. تەاتر سىنشىلارى دا، ءازىلدىڭ سىنشىلارى دا كوپ. سول، 17 ميلليون حالىقتىڭ كوڭىلىنەن شىعا بەرۋ مۇمكىن ەمەس. سونىڭ 100 مىڭىنىڭ كوڭىلىنەن شىقساڭ، سونىڭ ءوزى دە جەتىپ جاتىر»، - دەيدى اكتەر ەربولات تولەگەنوۆ.
ەستەرىڭىزگە سالا كەتسەك، وسىدان ءبىر جىلدان استام ۋاقىت بۇرىن شانشار تەاترىنىڭ اكتەرلەرىن زەينەپ احمەتوۆا «بايقايسىزدار ما؟ ءبىزدىڭ قازاقتىڭ جىگىتتەرى «قاتىن» بولۋعا اۋەس بولىپ الدى قازىر...» ، - دەپ قاتاڭ سىنعا العان بولاتىن. الايدا، اتالمىش ساتيرا ۇجىمىنىڭ باسشىسى ۋاليبەك ءابدىرايىموۆ باۋىرجان مومىش ۇلىنىڭ كەلىنىنە جاۋاپ بەرۋدەن توسىلىپ قالماعان- دى!
«كەشەگى قۇدايبەرگەن كوكەمىز قانداي ايەلدىڭ وبرازدارىن جاسادى ساحنادا. نە دەيمىز ەندى سوعان؟ دۇرىس ەمەس دەپ ايتامىز با؟ نەگە دۇرىس ەمەس؟ ايەلدەر ورىنداي المايتىن نارسەنى ورىنداپ بەردى. بۇل اكتەردىڭ شەبەرلىگى دەيدى. تالداعاندا، سىناعاندا وسى ماسەلەنى سىناسىن جۇرت. ايەل وبرازىن جاساي الدى ما ول؟ الدە قۇر بوسقا كيىنىپ شىعىپ، ءوزى مازاق بولىپ قالدى ما؟ مىنە ءبىز سول كەزدە دۇرىس دەپ سانايمىز»، - دەيدى ۋاليبەك ءابدىرايىموۆ.
