ءۇندىستاندا نارەستە ورتەۋ الدىندا ءتىرىلىپ كەتتى

Max Hospital مەديتسينالىق ورتالىعىنىڭ قىزمەتكەرلەرى جاڭا تۋعان ەگىزدەردىڭ ءبىرى ءولى تۋىپ، ەكىنشىسىنە وكپەنىڭ جاساندى ۆەنتيلياتسيالاۋ اپپاراتىن قوسۋ قاجەتتىگىن ايتقان. دارىگەرلەر العاشقى ءۇش كۇندىك ەمدەۋ ءۇشىن ەگىزدەردىڭ اتا-اناسىنان 1,5 مىڭ دوللار سۇراپ، ال ودان ءسابيدىڭ اۋرۋحانادا وتكىزگەن ءاربىر كۇنى ءۇشىن 775 دوللاردان تولەۋدى تالاپ ەتكەن. ونىڭ ۇستىنە بالا ءومىر ءسۇرىپ كەتۋى ءۇشىن ءۇش اي اۋرۋحانادا جاتۋى ءتيىس ەدى.

وعان شاماسى جەتپەگەن اتا-انا ءسابيدى باسقا اۋرۋحاناعا جاتقىزباق بولادى. سودان كەيىن دارىگەرلەر بالا شەتىنەدى دەگەندى ايتادى. ولار قايعىسى قالىڭداي تۇسكەن اتا-اناعا سىڭارلار سالىنعان ەكى پوليەتيلەن پاكەتتى تاپسىرادى.

التى ساعاتتان سوڭ، سۇيەگىن كرەماتسيالاۋ الدىندا عانا نارەستەلەردىڭ اكە-شەشەسى پاكەتتەردىڭ ءبىرى قيمىلداي باستاعانىن اڭعارىپ قالادى. لەزدە پاكەتتى جىرتىپ، بالانى جۋىق ماڭداعى اۋرۋحاناعا جەتكىزەدى. قازىر نارەستەنىڭ جاعدايى تۇراقتى.

ءۇندىستان دەنساۋلىق ساقتاۋ ءمينيسترى دجاگات پراكاش ناددا مۇنى جانتۇرشىگەرلىك وقيعا دەپ اتاپ، دەلي ۇكىمەتىنە بۇعان ءتيىستى شارالار قاراستىرۋدى تاپسىردى.

جەرگىلىكتى قۇقىق قورعاۋ ورگاندارى وقيعا بويىنشا تەرگەۋدىڭ باستالعانىن حابارلادى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى