قازاقستان تەمىرجولشىلارى قىتايلارعا ەلىمىزدىڭ ترانزيت- كولىكتىك الەۋەتىن تانىستىردى
بەيجىڭدە «نۇرلى جول» مەملەكەتتىك باعدارلاماسى مەن قىتايلىق «ءبىر بەلدەۋ - ءبىر جول» دامۋ ستراتەگياسىن ۇشتاستىرۋعا ارنالعان جيىن ءوتىپ جاتىر.
ەۋروپا، ورتالىق ازيا جانە پارسى شىعاناعى ەلدەرىنە قىتايدان تاسىمالداناتىن جۇكتىڭ دەنى ءبىزدىڭ ەلدەگى شويىن جولدار ارقىلى وتەدى. سوندىقتان حالىقارالىق دالىزدەردىڭ كولىكتىك- لوگيستيكالىق ينفراقۇرىلىمىن جاقسارتۋ بويىنشا ۇلكەن ءىس اتقارىلدى.
قازىر قىتايمەن شەكارالاس ايماقتاعى التىنكول جانە دوستىق تەمىرجول ستانتسيالارىنىڭ جۇك وتكىزۋ مۇمكىندىگى 40 ميلليون تونناعا دەيىن ۇلعايدى. سونىمەن بىرگە ترانسكاسپي باعىتى ارقىلى جۇك تاسىمالداۋعا دا بارىنشا نازار اۋدارىلىپ وتىر. قىتايدىڭ ليان- يۋن- گان پورتىنان كاسپيگە قاتىنايتىن تەمىرجولدىڭ قازاقستانداعى بولىگى جوندەلدى. بۇل ءدالىز ارقىلى جۇك تەڭىز جولىنا قاراعاندا ەۋروپاعا تەز جەتەدى. بيىل باكۋ- تبيليسي- كارسك باعىتىنىڭ ىسكە قوسىلۋى حالىقارالىق ءدالىز مۇمكىندىگىن ودان سايىن ارتتىردى.
2020- جىلعا دەيىن ترانسكاسپيي ترانزيتىنىڭ الەۋەتى 300 مىڭ كونتەينەرگە دەيىن ۇلعايادى. قازاقستان تەمىر جولى قىتاي - ەۋروپا ارالىعىندا 15 ترانزيتتىك باعىتتا قىزمەت كورسەتەدى.
امانجول يبراگيموۆ، «قازاقستان تەمىر جولى» ا ق پرەزيدەنتىنىڭ كەڭەسشىسى:
- «قۇرىق» پاروم ايلاعى ارقىلى كوپتەگەن جۇمىستار ىستەلىنىپ جاتىر. قازىرگى تاڭنىڭ وزىندە 1 ميلليوننان استام جۇك تاسىمالداندى. وسى جىلدىڭ اياعىندا جاڭاعى پارومدىق ايلاقتىڭ اۆتوموبيلدەر وتكىزۋ قولدانۋعا بەرىلەدى.
ليۋ بين، ليانيۋنگان قازاق- قىتاي لوگيستيكالىق كومپانياسىنىڭ باس ديرەكتورى:
- بيىل جىل سوڭىنا دەيىن ليانيۋنگان قازاق- قىتاي لوگيستيكالىق بازاسى ارقىلى وتەتىن كونتەينەر سانى 250 مىڭعا جەتەدى دەپ جوسپارلاپ وتىرمىز. بىلتىر بۇل كورسەتكىش 176 مىڭ كونتەينەردى قۇراعان بولاتىن. وسى جىلى تاسىمال كولەمى 1 ميلليون 500 مىڭ تونناعا ارتتى. ال 2018 -جىلى 200 مىڭ توننا قازاقستان استىعىن وڭتۇستىك شىعىس ازيا ەلدەرىنە تاسىمالداۋ جوسپارىمىزدا بار. كەرى باعىتتا ەكزوتيكالىق جەمىس جەتكىزىپ جول شىعىنىن اناعۇرلىم تومەندەتە الامىز.
www.24.kz
