اقجۇرەك تاڭاتاروۆ: سپورتتان كەتۋدى ويلاپ ءجۇرمىن
وسى رەتتە «قازاقپارات» ح ا ا ءتىلشىسى ەل ماقتانىشىنا اينالعان بالۋاندى سوزگە تارتىپ، سپورتشىنىڭ الداعى جوسپارى تۋرالى ءبىلدى.
- اقجۇرەك دوستىق ۇلى، «قازاقستاننىڭ 100 جاڭا ەسىمى» جوباسىندا جەڭىمپاز اتانۋىڭىزبەن قۇتتىقتايمىن. ايتۋلى شارانىڭ (پرەزيدەنتپەن كەزدەسۋ) الدىنداعى كوڭىل- كۇيىڭىز قالاي؟
- بۇل جوبا باستالعان كەزدە ەلدە بولماپ ەدىم. ماعان تەلەفون ارقىلى حابارلاسىپ، «قازاقستاننىڭ 100 جاڭا ەسىمى» جوباسىنا ۇمىتكەر رەتىندە تىركەدىك دەپ حابار بەردى. تۋىس- تۋعاندارىمىز، تانىس سپورتشىلارىمىز، جامبىل وبلىسى بولىپ ءبارى دە داۋىس بەرگەن ەكەن. قوڭىراۋ شالىپ، داۋىس بەرىپ جاتىرمىز دەپ ايتىپ جاتقاندار دا بولدى. كوپشىلىكتىڭ قولداۋىمەن «قازاقستاننىڭ 100 جاڭا ەسىمىنە» ەندىم.
- الداعى جوسپارلارىڭىز قانداي؟ بىرنەشە حالىقارالىق جانە الەمدىك دارەجەدەگى چەمپيوناتتارعا قاتىسىپ، جۇلدە الىپ كەلىپ كەلگەنىڭىزدى ەستىپ جاتىرمىز...
- الەم بىرىنشىلىگىنە دەيىن التى ءىرى جارىسقا قاتىستىم. ادەتتە، سپورتشىلار التى جارىستى ءبىر جىلدا وتكىزەدى. ال ماعان بۇل سىندى التى ايدا وتۋگە تۋرا كەلدى. سول سەبەپتەن، بيىلعى جىلدى دەمالىسپەن اياقتايمىن. دەمالىس دەگەنگە ارينە، اياقتى كوتەرىپ قويىپ، ۇيدە تىنىعىپ جاتۋ دەگەندى بىلدىرمەيدى. كۇنىنە ءبىر مەزگىل جاتتىعۋ جاسايمىن. ارتىمدا ەرىپ كەلە جاتقان ىنىلەرىم بار. سولاردى باپتاپ ءجۇرمىز.
- توكيو وليمپياداسى دا جاقىنداپ كەلە جاتىر. ەندى ءبىر وليمپيادانىڭ شىڭىن باعىندىرۋ جوسپارىڭىزدا جوق پا؟
- توكيو وليمپياداسىنا جەتە الامىن دەپ ايتا المايمىن. ونىڭ وزىندىك ناقتى سەبەپتەرى بار. ءبىر شەتىنەن جاسىم دا كەلىپ قالدى. ەكىنشىدەن، قازىرگى ۋاقىتتا كۇرەس ەرەجەلەرى وزگەرىپ بارادى. ماسەلەن، ءىرى جارىستاردا تاڭەرتەڭ سالماق ولشەۋ ءراسىمى وتەدى دە، ساعات 09:30-10:00 شاماسىندا جارىس باستالىپ كەتەدى. تۇسكە دەيىن بەس مارتە بوز كىلەمگە شىعىپ، جولىڭ بولسا فينالعا دەيىن شىعاسىڭ. ەرتەڭىندە تاعى سالماق ولشەپ، فينالدا كۇرەسەمىز. جاسى كەلگەن ادامدار ءۇشىن بۇل وتە قيىن.
تاعى ءبىر كەدەرگى - مەنىڭ سالماعىم ەندى وليمپيادا ويىندارىنا كىرمەيدى. ناقتىراق ايتقاندا، 10 سالماقتىڭ بۇدان بىلاي التاۋى عانا وليمپيادا ويىندارىنا ەنەدى. تورتەۋى وليمپيادالىق سالماق دارەجەلەرى سانالمايدى. بۇرىن گرەك- ريم كۇرەسىندە 7، ەركىن كۇرەس شەبەرلەرىندە 7 سالماق جازعى وليمپيادا ويىندارىنىڭ ەرەجەلەرىندە بولعان. ەكى سپورت تۇرىنەن ءبىر- ءبىر سالماقتى الىپ تاستاپ، قىزدارعا وليمپياداعا قاتىسۋعا مۇمكىندىك اشىلدى. نازىك جاندىلارعا وليمپياداعا قاتىسۋعا مۇمكىندىك پايدا بولدى دەگەنىمىزبەن، ەرەجەدەگى بۇل وزگەرىس ءبىزدىڭ سالماقتاعى بالۋانداردىڭ جولىن بوگەدى. قازىر بالۋانداردىڭ ءبىرازى م م ا سپورتىنا كەتىپ جاتىر. قالعان ءتورت سالماقتا الەم بىرىنشىلىگىندە شىعۋعا بولادى. ال وليمپيادا مەن الەم بىرىنشىلىگىن سالىستىرۋعا البەتتە كەلمەيدى.
- دەمەك، سپورتتان كەتۋدى ويلاپ ءجۇرسىز بە؟
- ءيا، سپورتتان كەتۋدى ويلاپ ءجۇرمىن. ءساتىن سالسا، كەلەسى جىلى سپورتتان كەتەتىنىم تۋرالى رەسمي تۇردە حابارلايمىن.
- ەركىن كۇرەستەگى مانسابىڭىزدى اياقتايتىنىڭىزدى ايتقانىڭىزبەن، جالپى سپورتتان قول ۇزبەيتىن بولارسىز؟
- البەتتە! سپورت ينتەرناتىنان ءوزىمىز ىرىكتەپ العان التى بالانىڭ تورتەۋى جاقىندا ۇزدىك ونەر كورسەتىپ، بىرەۋى قازاقستان بىرىنشىلىگىندە توپ جاردى. ال ۇشەۋى جۇلدەگە يە بولدى. بۇل - ءتورت ايدىڭ ناتيجەسى. مەن ءۇشىن بۇل وتە ۇلكەن دارەجە، زور قۋانىش دەسەم دە بولادى. نەگە دەسەڭىزدەر، 20 جىل جاتتىعۋ جاساتىپ، قازاقستان بىرىنشىلىگىندە شاكىرتتەرى جۇلدەگە ىلىنبەي جۇرگەن جاتتىقتىرۋشىلار بار. ال 4 ايدا قازاقستان چەمپيونى اتاعىن العان شاكىرتتى تاربيەلەگەنىمىزگە شۇكىر دەيمىن.
- ارتىڭىزدان ەرگەن جاس بۋىن بالۋاندارعا نە تىلەيسىز؟
- جاس بۋىن بالۋاندارعا تىلەيتىنىم، بىرىنشىدەن جەڭىمپاز بولۋ ءۇشىن ەلىڭدى، جەرىڭدى، كوك بايراعىڭدى ءسۇيىپ، پاتريوت بولۋ كەرەك دەپ ويلايمىن. پاتريوت بولساڭىز، بيىك تۇعىردان كورىنەسىڭ. ەكىنشىدەن، ەڭبەك ەتۋ كەرەك. ەڭبەك باردا جەڭىس تە بار. سپورتتا قيىن جاعدايلار بولىپ جاتادى. ءار جاماندىقتىڭ ارتىندا ءبىر جاقسىلىق جاتادى دەيدى عوي. سول سەبەپتەن كۇردەلى كەزەڭدەردە ءوزى- ءوزىڭدى سىندىرماي، ەڭبەك ەتسەڭ، جەڭىسكە جەتۋ، وليمپيادا شىڭىن باعىندىرۋ قولىڭنان كەلەر دەپ ويلايمىن.
- سۇحباتىڭىزعا راحمەت!
- سىزگە دە راحمەت!
اۆتور: ايان بەكەن ۇلى
