اقتوبەدە «قازاق حالقىنا مىڭ العىس» ستەللاسى بوي كوتەردى
اقتوبەدەگى تۇڭعىش پرەزيدەنت اتىنداعى ورتالىق ساياباق جانىنان «قازاقستان حالقىنا مىڭ العىس» ستەللاسى بوي كوتەردى. قازاقستان حالقىنىڭ بىرلىگىن، تاتۋلىعىن بىلدىرەتىن ەسكەرتكىشتىڭ بيىكتىگى 30 مەتر، كومپوزيتسياسى 5 بولىكتەن تۇرادى. ستەللادا قازاقستاننىڭ كارتاسى بەينەلەنگەن. بۇل - ەل شەكاراسىن ايقىنداپ، لاندشافتى مەن وبلىستاردىڭ ورنالاسۋىن، استانا قالاسى تۋرالى اقپارات بەرەتىن بولىگى.
ودان جوعارى 7 كەزەڭگە بولىنگەن ارنايى تاقتا بار. وندا ەجەلگى قازاقتان (ب. ز. د VII- ب. ز VII ع. ع)، ورتا عاسىرداعى قازاقستان (VII- XVIII ع. ع)، قازاق حاندىعى تۇسىنداعى قازاقستان (1465-1860 ج ج. )، رەسەي يمپەرياسى قۇرامىنداعى قازاقستان ( 1860-1917 ج ج.)، سوعىسقا دەيىنگى جىلدارداعى قازاقستان (1917-1941 ج ج.)، سوعىستان كەيىنگى جىلدارداعى قازاقستان (1941-1990 ج ج.) جانە ەگەمەندى قازاقستان (1991 ج.) تۋرالى كورىنىس بەرەتىن سۋرەتتەر تاسقا تۇسىرىلگەن.
ستەللانىڭ ۇشار باسىندا قاناتىن كەڭگە جايعان قىران قۇسى ورنالاسقان. كيىز ءۇي، شاڭىراق تا بەينەلەنگەن.
«ەلباسى نۇرسۇلتان نازاربايەۆ تاۋەلسىزدىك العان كۇننەن باستاپ ۇلتتار اراسىنداعى دوستىق، تاتۋلىق، تۇراقتىلىققا نازار اۋداردى. تاۋەلسىزدىك العان 26 جىل ىشىندە قازاقستان دۇنيەجۇزىنە ءوز ورنى بار ەكەنىن دالەلدەدى. حالىقارالىق ۇيىمداردىڭ بارلىعى قازاقستاندى مويىندادى. پرەزيدەنت نۇرسۇلتان نازاربايەۆتىڭ سىرتقى، ىشكى ساياساتتى قاتار الىپ ءجۇرۋى، ەلىمىزدىڭ مارتەبەسىن ارتتىرا ءتۇستى. قازىر قازاقستاننىڭ ەڭ ۇلكەن جەتىستىگى - ۇلتتار اراسىنداعى تاتۋلىقتى، بىرلىكتى ساقتاۋى. قانىمىزعا سىڭگەن قاسيەت بار. ءبىز - باۋىرمالمىز. اشارشىلىق، سوعىس كەزىندە قازاقستان ميلليونداعان ادامداردى تۋعانىنداي قارسى الدى»، - دەدى اقتوبە وبلىسىنىڭ اكىمى بەردىبەك ساپاربايەۆ.
ءوڭىر باسشىسى بۇل ەسكەرتكىش جاستارعا ۇلگى- ونەگە بەرەتىن ورىنعا اينالاتىنىنا سەنىم ءبىلدىردى. ءارى قازاق حالقىن ساقتاپ قالۋ ءۇشىن سالت- ءداستۇردى، ادەت- عۇرىپتى ۇستانۋ پارىز ەكەنىن جەتكىزدى.
جاڭا نىساندى اقتوبەلىك «اقتوبە ساۋلەت»، «سولەرەس» كومپانيالارى قارجى ءبولىپ، سالىپ بەردى. ستەللانىڭ اشىلۋىنا قاتىسقان وزگە ۇلت وكىلدەرى دە حالىق باس قوساتىن، مادەني، رۋحاني شارالاردىڭ ۇيىتقىسى بولار ورىننىڭ قۇرىلىسىنا ريزاشىلىقتارىن ءبىلدىردى.
«وڭىردە ونەر ورتالىعى، شىعارماشىلىق ورتالىعى، ءبىلىم، دەنساۋلىق ساقتاۋ ورتالىقتارى اشىلىپ جاتىر. ءبارى كوز قۋانتادى. حالىق پەن بيلىك - ءبىر، بىرىگىپ جۇمىس ىستەپ جاتىر. ءبىزدى سول قۋانتادى. قازاق حالقى قوناقجاي، كورشىسىن سىيلايدى. ەل ەرتەڭى ءۇشىن تاتۋلىقتى، ىنتىماقتى تاڭدادى. سوندىقتان بولار، قازاقستاندا تۇراتىن ءار وزگە ۇلت وكىلى قازاق حالقىنا ۇنەمى العىسىن ءبىلدىرىپ كەلەدى. تاتۋلىعىمىز، بىرلىگىمىز جاساي بەرسىن»، - دەدى اقتوبە وبلىستىق ءماسليحاتىنىڭ دەپۋتاتى سەرگەي ۆيشنياك.
اۆتور: التىناي ساعىندىقوۆا
