ق ر پرەزيدەنتى: ءبىر توپ جاس عالىمعا ارناپ زەرتحانا سالۋعا بولادى

 31 جاستاعى جاس فيزيك ەرنۇر رىسماعامبەتوۆ پرەزيدەنتتىڭ الدىندا ءوزىن تانىستىرا كەلە، فيزيكا سالاسىنداعى جەتىستىكتەرىن ءتىزىپ ءوتتى. قازىرگى ۋاقىتتا ەرنۇر «استانا» حالىقارالىق قارجى ورتالىعىندا ۇزدىكسىز كاسىبي دامۋ بيۋروسىن باسقارادى. فيزيكادان بىرنەشە ءىرى بايقاۋلاردىڭ جەڭىمپازى.

«2002 - جىلى فيزيكا پانىنەن دۇنيەجۇزىلىك وليمپيادادا ءبىرىنشى ورىندى يەلەنىپ، التىن مەدالعا قول جەتكىزدىم. سول جىلى الەمگە ايگىلى كاليفورنيا ۋنيۆەرسيتەتىنە شاقىرتۋ الدىم. الايدا، سول جىلى امەريكاعا ۇشىپ بارۋعا قاجەتتى 1200 ا ق ش دوللارىن تابۋدىڭ ءوزى قيىن ەدى. ءۇمىتىم ۇزىلە جازدادى. ءتۇرلى كومپانيالاردان دەمەۋشىلىك سۇرادىم. سوڭىندا تاعى ءبىر حالىقارالىق وليمپيادادان توپ جارىپ، قۇنى 1300 ا ق ش دوللارلىق نوۋتبۋكتى سىيعا الدىم. ءبىراق ونى جولعا بيلەت الۋ ءۇشىن ساتىپ جىبەردىم»، - دەيدى ەرنۇر.

جاس ورەن بارعان ۋنيۆەرسيتىندە تانىمال ونەرتاپقىش يلون ماسكپەن كەزدەسىپتى. قارجى سالاسىنا قاتتى قىزىعىپ، حالىقارالىق قارجى ورتالىقتارىنىڭ جۇمىسىن ەرنۇر امەريكادا مەڭگەرە باستاعان.

«ۇلكەن تاجىريبە جيناپ، ەلگە ورالدىم. بىرنەشە حالىقارالىق ينۆەستيتسيالىق قوردا ەڭبەك ەتكەنىممەن، ەلگە قىزمەت ەتۋ ارمانىما اقىرى بەت بۇرعان ەدىم. 2009 -جىلى مەكتەپ وقۋشىلارىن فيزيكا پانىنەن دايىنداي باستادىم. مەكسيكا، تايلاند ەلدەرىندە فيزيكا ءپانىنىڭ بىلگىر وقۋشىلارىمىز ۇزدىك وندىققا كىردىك»، - دەيدى ەرنۇر.

وتتى جاستىڭ سوزىنە ىرزا بولعان ەلباسى الداعى ۋاقىتتا دا عىلىمي باستامالارعا قولداۋ بىلدىرەتىنىن ايتىپ ءوتتى.

«ماتەماتيكا مەن فيزيكا - بولاشاقتىڭ عىلىمى. ارينە، ماماندار دايارلاۋ كەرەك. بۇكىل دۇنيەجۇزىندەگى ءوسىپ- وركەندەپ كەتكەن ەلدەردىڭ بارلىعى سول ماماندىقتاردى مەڭگەرىپ، جاڭالىقتاردىڭ بارلىعىن اشتى. سونداي بولسا ەكەن دەپ ويلايمىن. ەگەر دە سونداي جاس ءبىر توپ عالىمدار بولسا، سولارعا ارناپ ارنايى زەرتحانا سالۋعا بولادى. جۇمىس جۇرگىزىپ، جاعدايلارىن جاساۋعا بولادى. سەبەبى، بىزگە قاجەتى سول. سول ءۇشىن «بولاشاق» باعدارلاماسى ارقىلى قىزدار مەن ۇلداردى جىبەرىپ وتىرمىن عوي»، - دەپ اتاپ ءوتتى نۇرسۇلتان نازاربايەۆ.

اۆتور: ايان بەكەن ۇلى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى