قازاقستان- قىتاي گاز قۇبىرىنىڭ جاڭا كومپرەسسورلىق ستانسياسى اشىلدى

 «قازمۇنايگاز» كومپانياسى مەن قىتايلىق CNPC كورپوراتسياسىنىڭ بىرلەسكەن جوباسى ارقاسىندا ەندى ەلدى مەكەندەردى كوگىلدىر وتىنمەن قامتىپ قانا قويماي، گاز تاسىمالىنىڭ كولەمىن جىلىنا 25 ميلليارد تەكشە مەترگە دەيىن ارتتىرۋعا بولادى ەكەن.

 №1 كومپرەسسورلىق ستانسيا تۇرىكمەنستان، وزبەكستان، قازاقستان جانە قىتايدىڭ گاز جەلىلەرىن بايلانىستىرادى. جاڭا كومپرەسسورلىق ستانسيانىڭ قۇرىلىسىنا 1 مىڭنان استام ادام، 200-دەن استام تەحنيكا تارتىلعان. «بۇل نىسان شىعىستىڭ گاز ءترانزيتىن ەكى ەسەگە ارتتىرادى» ، -  دەيدى «قازمۇنايگاز» ۇ ك- نىڭ گاز تاسىمالداۋ جانە ماركەتينگى جونىندەگى اتقارۋشى ۆيتسە- پرەزيدەنتى قايرات شارىپبايەۆ.

ينۆەستيتسيالىق جوبانى «قازترانسگاز» جانە «تاپلاين» كومپانيالارىنىڭ ەنشىلەس كاسىپورنى «ازيالىق گاز قۇبىرى» ىسكە اسىردى.

عالىمجان ساعىنتايەۆ، «ازيالىق گاز قۇبىرى» ج ش س باس ديرەكتورىنىڭ ءبىرىنشى ورىنباسارى:

- جالپى قازاقستان- قىتاي گاز قۇبىرىنىڭ قۋاتتىلىعى -  جىلىنا 55 ميلليارد تەكشە مەتر. ەندىگى جىلدان باستاپ جوسپاردا 50 ميلليارد تەكشە مەتر گازدى تاسىمالدايمىز دەپ وتىرمىز. ونىڭ ىشىندە 5 ميلليارد تەكشە مەترى قازاقستاننىڭ گازى.

گاز ينفراقۇرىلىمىنىڭ جاڭا نىسانى شارداراداعى كوكسۋ ەلدى مەكەنىنە جاقىن ورنالاسقان. بۇل گاز قۇبىرى «س» تارماعىنىڭ ونىمدىلىگىن ارتتىرۋعا جانە جىلىنا 25 ميلليارد تەكشە مەترگە دەيىن گاز تاسىمالداۋعا مۇمكىندىك بەرەدى.

www.24.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى