قازاقستان ۇلتتىق ارناسى جاپونيانىڭ ەڭ تانىمال تەلەارناسىمەن ىنتىماقتاسپاق
2017 -جىلدىڭ 27-29 - قاراشا ارالىعىندا «قازاقستان» ر ت ر ك» ا ق دەلەگاتسياسى جۇمىس ساپارىمەن توكيوعا بارىپ قايتتى. ساپار بارىسىندا جاپونيانىڭ ەڭ تانىمال تەلەارنالارىنىڭ ءبىرى - FujiTV- دە بولىپ، سول ارنانىڭ تاڭعى اقپاراتتىق باعدارلامالارى مەن جاڭالىقتار ءبولىمىنىڭ ۇيىمداستىرىلۋ ەرەكشەلىكتەرىمەن تانىستى.
سونداي- اق، NHK كورپوراتسياسىنا بارىپ، بۇكىل الەمگە حابار تاراتاتىن NHK World تەلەارناسىنىڭ تانىستىرۋ راسىمىنە قاتىستى. كەزدەسۋ اياسىندا قازاقستاندىق دەلەگاتسيا NHK حابار تاراتۋشى كورپوراتسياسىنىڭ پرەزيدەنتى - ريوچي ۋەدامەن جانە ءبىرقاتار دەپارتامەنتتەردىڭ باسشىلارىمەن تانىسىپ، ەكىجاقتى كەلىسسوزدەر جۇرگىزدى.
«قازاقستان» ر ت ر ك» ا ق باسقارما ءتوراعاسى - ەرلان قارين استانا جانە ەكسپو-2017 مامانداندىرىلعان كورمەسى جايلى تۇسىرىلگەن ارنايى باعدارلاما ءۇشىن جاپوندىق ارىپتەستەرىنە العىسىن ءبىلدىردى.
ايتا كەتسەك، ۇزاقتىعى 2 ساعاتقا جۋىق اتالمىش جوبا وسى جىلدىڭ قازان ايىندا جاپوندىق NHK تەلەارناسىنىڭ ەفيرىندە كورسەتىلگەن بولاتىن. جاپوندىق جۋرناليستەردىڭ ايتۋىنشا بۇل جاپون تەلەۆيزياسى تاريحىنداعى قازاقستان جايلى تۇسىرىلگەن ەڭ اۋقىمدى جوبالاردىڭ ءبىرى.
كەزدەسۋ بارىسىندا ەكى جاق بولاشاق جوسپارلارىمەن ءبولىسىپ، بىرلەسىپ دەرەكتى فيلمدەر شىعارۋمەن قاتار، ءوزارا تەلەحيكايالار مەن كونتەنت الماستىرۋ سياقتى ىنتىماقتاستىق باعىتتارىن قاراستىردى.
