نۇرسۇلتان نازاربايەۆ الەمدىك كوشباسشى- رەفورماتورلارمەن ءبىر قاتاردا تۇر - ساراپشى
دەپ حابارلايدى «قازاقپارات» ح ا ا ءتىلشىسى.
«قازاقستان بۇگىن كەزەكتى مارتە تۇڭعىش پرەزيدەنت كۇنىن تويلاپ جاتىر. وسىناۋ ايتۋلى داتا تاۋەلسىزدىكتىڭ 26 جىلدىعى قارساڭىندا وتكەنگە تاعى ءبىر مارتە كوز جۇگىرتىپ، دەربەس ەلدىڭ ءجۇرىپ وتكەن جولىنا وي تاستاۋعا ۇندەيدى»، - دەيدى ساراپشى.
تيمۋر شايمەرگەنوۆتىڭ پايىمداۋىنا قاراعاندا، الەمدىك تاريح ءۇشىن 26 جىل - ءبىر عانا ءسات بولعانىمەن، قازاقستان تاريحىنىڭ كوزقاراسىمەن قاراساڭىز، وسى كەزەڭ مەملەكەتتىلىكتىڭ قالىپتاسۋىنا، ەل ىرگەسىنىڭ بەكۋىنە نەگىز بولعانىن بايقاۋعا بولادى.
«البەتتە، وتكەن كۇندەرگە بۇگىنگى تانىممەن قاراپ وتىرىپ، قانداي ۋاقىتتا قانداي دۇرىس قادامنىڭ جاسالعانىن ساراپتاۋ دا، ءتىپتى سىن ايتۋ دا وڭاي. ءبىراق، توقسانىنشى جىلدارى نۇرسۇلتان نازاربايەۆ تا ونداي مۇمكىندىك جوق ەدى. جاس مەملەكەتتىڭ كوشباسشىسى رەتىندە مەملەكەت باسشىسىنا وتە دۇرىس تاريحي شەشىم قابىلداپ، ەل دامۋىنىڭ ءتيىمدى جولىن تاڭداۋ شارتى تۇردى. پرەزيدەنتتىڭ ساياسي كوشباسشىلىعى مەن اقىل تارازىسىنا سالا وتىرىپ مەملەكەتتى باسقارۋىنىڭ ارقاسىندا قازاقستان ستراتەگيالىق سىندارعا لايىقتى جاۋاپ بەرۋمەن بىرگە، ءتىپتى قىسىلتاياڭ شاقتا دا ەل يگىلىگىنە جارار جۇمىستاردى جۇزەگە اسىرىپ ۇلگەردى»، - دەيدى تيمۋر شايمەرگەنوۆ.
ساياسات عىلىمدارىنىڭ كانديداتى ءوز سوزىندە جاھان تاريحىندا مودەرنيزاتسيا جولىمەن دامۋ داڭعىلىنا ءتۇسۋ بويىنشا تاريحي ۇلگىلەر بارشىلىق ەكەنىن العا تارتادى.
«ءار كەزەڭدە الەم حالقىن مۇنداي جەتىستىكتەرىمەن سينگاپۋر، وڭتۇستىك كورەيا، تۇركيا، ب ا ءا، مالايزيا، مەكسيكا، يندونەزيا، برازيليا سىندى ەلدەر دە تامساندىرعان بولاتىن. بۇل قاتارعا دامۋشى ەلدەردىڭ ىشىنەن جاھاندىق دەرجاۆاعا اينالعان قىتايدى دا قوسۋعا بولادى. اتالعان مەملەكەتتەر ايماقتىق دامۋدىڭ درايۆەرلەرى بولا وتىرىپ، حالىقارالىق جۇيەنىڭ وزگەرۋىنە سەپتىگىن تيگىزدى. ولاردىڭ كوبى الەمدىك ەكونوميكاعا ءسوزسىز اسەرىن تيگىزەتىن «الىپ جيىرمالىقتىڭ» قاتارىندا. ال قازاقستاننىڭ جىل سايىن G20 كەزدەسۋلەرىنە شاقىرىلۋى دا ءبىزدىڭ رەسپۋبليكانىڭ پروگرەسسيۆتى ەلگە اينالعانىن دالەلدەي تۇسەدى»، - دەيدى ول.
ساراپشى سونىمەن بىرگە، جوعارىدا اتالعان ەلدەردىڭ ءارقايسىسىنىڭ دامۋ جولى ءارتۇرلى ەكەنىن تىلگە تيەك ەتتى.
«ەگەر تاريح جانە گەوگرافيا، قوعام جاعدايى مەن ەكونوميكانى ەسەپكە الىپ، تۋرا كوزقاراسپەن قازاقستانعا قارايتىن بولساق، ەلىمىزدىڭ تاۋەلسىزدىك العالى بەرى ءجۇرىپ وتكەن جولى ول مەملەكەتتەردىڭ ەشقايسىسىنان كەم ەمەس. قازاقستان پرەزيدەنتى ءوز سۇحباتتارىندا جەكە كوزقاراسىنىڭ قالىپتاسۋىنا اتاتۇرىك، شارل دە گولل، فرانكلين رۋزۆەلت، م. موحاماد، مارگارەت تەتچەر، لي كۋان يۋ سەكىلدى ايگىلى قايراتكەرلەر اسەر ەتكەنىن ايتا وتىرىپ، ولاردىڭ مەملەكەتتى جاڭا دەڭگەيگە جەتكىزگەنىن اتاپ وتكەن ەدى. وسى رەتتە قازاقستاننىڭ تۇڭعىش پرەزيدەنتى ءوزىنىڭ جاڭعىرتۋ جولىنىڭ اۆتورى رەتىندە الەمدىك كوشباسشى- رەفورماتورلارمەن ءبىر قاتاردا تۇرعانىن ايتۋعا بولادى»، - دەيدى تيمۋر شايمەرگەنوۆ.
ول سونداي- اق، نۇرسۇلتان نازاربايەۆ ەشقاشان شەتەلدىك، ەۋروپالىق نەمەسە امەريكالىق دامۋ مودەلىن كوشىرە سالماعانىن ەسكە سالدى.
«ءيا، بۇل نەگىزىنەن ءتىپتى مۇمكىن دە ەمەس - مەملەكەتتەر، ساياسي- ەكونوميكالىق جاعدايلار، تاريحي ءداۋىر ءارتۇرلى ەدى. الايدا الەمدىك تاجىريبەدەگى مەملەكەتتىك قۇرىلىمنىڭ ءبىرشاما امبەباپ قاعيداتتارىن ىرىكتەي وتىرىپ، قازاقستاندىق كوشباسشى ول جولداردى ۇلتتىق كونتەكستكە شەبەر ەنگىزە ءبىلدى. ءتيىمدى رەفورمالار ارقىلى وڭتايلى باسقارۋدىڭ وزىندىك مودەلىن قالىپتاستىردى. جاڭعىرتۋدىڭ ساتتىلىگى تۇڭعىش پرەزيدەنتتىڭ مەملەكەتتىك باسقارۋداعى مودەلىنە تىكەلەي بايلانىستى»، - دەيدى ساراپشى.
تيمۋر شايمەرگەنوۆ ءوز سوزىندە «نازاربايەۆ مودەلىنە» - «كوشباسشىلىق ءستيلى، ستراتەگيالىق تاسىلدەر مەن باسقارۋشىلىق شەشىمدەردىڭ، قىسقا ۋاقىت ىشىندە ەلدىڭ الەۋمەتتىك جانە مەملەكەتتىك قۇرىلىمىن قالپىنا كەلتىرە الاتىن مودەلى» دەپ باعا بەردى.
«بۇگىن دە ءبىز «نازاربايەۆ مودەلىنە» قازاقستان ءۇشىن بارلىق «تۇزاقتاردان» اينالىپ ءوتىپ، تۇراقتى دامۋ تراەكتورياسىنا جەتكىزگەن تولىق باسقارۋشىلىق تسيكل دەپ باعا بەرە الامىز. بۇل باعا وتاندىق يدەولوگيامەن ەمەس، بەدەلدى حالىقارالىق ۇيىمداردىڭ تاۋەلسىز رەيتينگتەرىمەن راستالىپ وتىر» ، - دەپ ءتۇيدى ءسوزىن تيمۋر شايمەرگەنوۆ.
اۆتور: ايان بەكەن ۇلى
