ماڭعىستاۋدا «رۋحقا - ۇران، ۇلتقا - قورعان» اتتى اقىندار ايتىسى ءوتتى
ماڭعىستاۋ وبلىسى اكىمدىگىنىڭ باستاماسىمەن ۇيىمداستىرىلعان سايىستىڭ ماقساتى - ايتىس ونەرىنىڭ دامۋىنا مەملەكەتتىك دەڭگەيدە قولداۋ كورسەتۋ، ەلىمىزدىڭ تاۋەلسىزدىك جىلدارىندا قول جەتكىزگەن تابىستارى مەن قۇندىلىقتارىن، وڭىردە جۇزەگە اسىرىلىپ جاتقان جاسامپاز جوبالاردى دارىپتەۋ، ماڭعىستاۋ ايتىس مەكتەبىنىڭ شىعارماشىلىق الەۋەتىن ناسيحاتتاۋ.
«ابىل مەن نۇرىم، قاشاعان مەن ءساتتىعۇلداي ءسوز زەرگەرلەرىن تۋدىرعان ماڭعىستاۋ توپىراعىندا، كونەدەن جەتكەن بەكزات ونەر، سۋىرىپسالمالىق- يمپروۆيزاتورلىق شىعارماشىلىقتىڭ بيىك شىڭى - ايتىس قايتا جاڭعىردى.
ايتىس - بەت جىرتىسىپ، جاۋاپتاسۋ ەمەس، ساياساتتان ادا، وردالى ويى، سۇڭعىلا سوزىمەن تىڭدارماننىڭ كوڭىل تۇكپىرىنە وي سالىپ، زامانا سازىن تولعاپ، ەلدىككە، ىنتىماققا ۇندەۋ! حالىق جازۋشىسى ءابىش كەكىلباي ۇلىنىڭ سوزىمەن ايتار بولساق: «بيىك تالعامدى تەك ساليقالى ونەر، سالاۋاتتى سۋرەتكەر عانا وسىرەدى. بيىك تالعامسىز بيىك پاراسات جوق. ال بيىك پاراسات ۇلكەن جاۋاپكەرشىلىك. بۇگىنگى ۇلكەن وزگەرىستەر ونسىز جۇزەگە اسا المايدى. رۋحاني بەدەرسىزدىك ساياسي تاۋەلسىزدىكتى دە تارك ەتەدى».
سەبەبى، سانا وزگەرمەي، ساپا وزگەرمەيدى. سوندىقتان اقىندارىمىز «رۋحاني جاڭعىرۋ» ۇعىمىن تەرەڭنەن تالداپ، وسى ۇعىم اياسىنداعى وتانسۇيگىشتىك، تاۋەلسىز ەلىمىزدىڭ جەتىستىكتەرىن جان- جاقتى جىرلاي بىلۋلەرى كەرەك. ءسوز ءقادىرى تومەندەمەي، بۇگىنگى ايتىستىڭ ءدۇبىرى دۇنيەنى شارلاسىن، تىڭداۋشىنىڭ قۇلاق قۇرىشىن قاندىرسىن! مەرەكەمىز قۇتتى بولسىن!»، - دەدى ايتىس بارىسىندا اقىندارعا اق جول تىلەگەن ماڭعىستاۋ وبلىسىنىڭ اكىمى ەرالى توعجانوۆ.
جىر بايگەسىنە رەسپۋبليكاعا تانىمال 16 اقىن قاتىسىپ، باق سىنادى.
ايتىس قورىتىندىسىندا باس جۇلدەنى (ءارقايسىسى 3 ميلليون تەڭگەدەن) ماڭعىستاۋلىق مەلس قوسىمبايەۆ پەن پاۆلودارلىق اسپانبەك شۇعاتايەۆ جەڭىپ الدى. قىزىلوردالىق مۇحتار نيازوۆ ءبىرىنشى (2 ميلليون تەڭگە)، سەمەيلىك اسەم ەرەجە قىزى مەن باتىس قازاقستاندىق جانسايا مۋسينا ەكىنشى (1 ميلليون تەڭگەدەن)، رۇستەم قايىرتاي ۇلى (الماتى)، اباي جولماعامبەتوۆ (ماڭعىستاۋ)، شالقارباي ءىزباساروۆ (اتىراۋ) جانە ەرشات قايبولدين (اقتوبە) ءۇشىنشى ورىنعا (400 مىڭ تەڭگەدەن) يە بولدى.
«بۇل جولى اقىندار ساحنادا جەرەبە سۋىرىپ، ايتىستى. سوعان قاراماستان، دەڭگەيى جوعارى بولدى. ياعني ەشكىم جۇرت ويلايتىنداي، الدىن الا دايىندالماي، سۋىرىپ سالمالىقتىڭ ۇلگىسىن كورسەتتى»، دەدى «قازاقپارات» تىلشىسىنە اسەم ەرەجە قىزى.
شارا اياسىندا سونداي-اق «ەلباسى جانە رۋحى جاڭعىرعان ماڭعىستاۋ» دەپ اتالاتىن فوتوكورمە ءوتتى. كورمەگە 100 گە جۋىق سۋرەتتەر قويىلعان. ماڭعىستاۋ وبلىسىنىڭ اكىمى ەرالى توعجانوۆ ارنايى بارىپ، ەلباسىنىڭ وڭىرىمىزدەگى ساپارى بارىسىنداعى سۋرەتتەر مەن ايماقتا وتكەن تاريحي شارالاردىڭ كورىنىسىن تاماشالادى.
