مۇناي وڭدەۋ زاۋىتتارى كەڭەستىك ستاندارتتاردان ارىلادى

بۇل تۋرالى «قازمۇنايگاز» ۇ ك ا ق- نىڭ مۇنايدى تاسىمالداۋ، قايتا وڭدەۋ جانە ماركەتينگ جونىندەگى ۆيتسە- پرەزيدەنتى مىندەتىن اتقارۋشى دانيار تيەسوۆ ايتتى، دەپ حابارلايدى قازاقپارات ءتىلشىسى.

«بۇگىندە ءبىز مۇناي وڭدەۋ زاۋىتتارىن مۇنايدى ايداۋدى جوعارلاتۋ باعدارلاماسىنا كوشىردىك. ازيادا، سولتۇستىك امەريكادا جانە ەۋروپاداعى زاۋىتتاردا جىل سايىن كۇردەلى جوندەۋ جۇمىستارى جۇرگىزىلمەيدى، ولار 3-4 جىلدا ءبىر رەت جوندەۋدەن وتەدى. قازىر زاۋىتتارىمىزدى ءۇشجىلدىق جوندەۋ كەزەڭدەرگە اۋىستىرىپ جاتىرمىز»، - دەدى تيەسوۆ ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.

ونىڭ ايتۋىنشا، بۇعان ەكى سەبەبى بار.

«بىرىنشىدەن، زاۋىتتاردىڭ تەحنيكالىق جاي- كۇيىن تاعى دا تەكسەرىپ شىعۋ قاجەت بولدى، قاجەتتى شارالاردى جۇرگىزدىك. ودان بولەك، ەڭ باستىسى - نورماتيۆتىك بازامەن جۇمىس ىستەدىك، سەبەبى قازىرگى ستاندارتتار كەڭەس وداعىنان بەرى جۇرگىزىلىپ كەلدى: جىل سايىن زاۋىتتى توقتاتىپ، ءاربىر اپپاراتتى تەكسەرۋ كەرەك، كۋالاندىرۋ جۇرگىزىپ، كوپتەگەن ءمور سوقتىرۋ كەرەك... قازىرگى ۋاقىتتا بۇل جۇمىستاردى اياقتادىق. 2018 -جىلدان باستاپ، كۇردەلى جوندەۋ جۇمىستارى جۇرگىزىلگەن كەزدە زاۋىتتاردىڭ بىرەۋى عانا توقتايتىنداي سيكلگە كوشەمىز»، - دەدى تيەسوۆ.

ۇلتتىق كومپانيا وكىلدەرى حابارلاعانداي، 2018 -جىلى شىمكەنت مۇناي وڭدەۋ زاۋىتى عانا كۇردەلى جوندەۋگە جابىلىپ، جۇمىسىن ۋاقىتشا توقتاتادى.

«بۇل جاڭعىرتۋ جۇمىستارىمەن دە بايلانىستى، سەبەبى كەلەسى جىلى جاڭا تەحنولوگيالىق قوندىرعىلار قۇرىلىسىنىڭ ۇلكەن كولەمىن اياقتايمىز جانە كۇردەلى جوندەۋ كەزىندە ەكى قوندىرعىنى ىسكە قوسامىز. قالعان ەكى زاۋىت تەك پروفيلاكتيكالىق جوندەۋ جۇمىستارى ءۇشىن توقتاتىلادى، ءبىراق بۇل بىزدەگى قالىپتى پروتسەدۋرا، قىس- جاز ماۋسىمدارىنا اۋىسۋ كەزىندە جۇرگىزىلەدى. سول سەبەپتى، زاۋىتتاردىڭ تەحنيكالىق ازىرلىگى تۇرعىسىنان بەنزين تاپشىلىعى بولمايدى»، - دەپ اتاپ ءوتتى ق م گ وكىلى.

اۆتور: ايجان سەرىكجان قىزى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى