نۇرسۇلتان نازاربايەۆ مينسكىدە قىرعىز پرەزيدەنتى سوورونباي جەەنبەكوۆپەن كەزدەستى
دەپ حابارلايدى قازاقپارات ءتىلشىسى مينسكىدەن.
«بىرىنشىدەن، سوورونباي ءشارىپ ۇلىن سايلاۋدا جەتكەن تابىستارىمەن شىن جۇرەكتەن قۇتتىقتادىم. الىس جەردە بولسا دا، وسىلاي كەزدەسىپ قالدىق. ەكىنشىدەن، ەكى ەلدىڭ اراسىنداعى تۋىسقاندىق- باۋىرلاستىق قاتىناستىڭ بارلىعىن ورنىنا كەلتىرەمىز دەپ كەلىستىك. ول - ەكى حالىقتىڭ مۇددەسى. شەكارادا بولعان جاعدايدىڭ نە ءۇشىن ورىن العانىن ءبارىمىز بىلەمىز»، - دەپ اتاپ ءوتتى ەلباسى مينسكىدەگى كەزدەسۋدەن كەيىن ب ا ق وكىلدەرىنە بەرگەن سۇحباتىندا.
مەملەكەت باسشىسى الداعى ءبىر- ەكى كۇندە قىرعىز ۇكىمەتىنىڭ دەلەگاتسياسى قازاقستانعا ارنايى كەلىپ، ەكى ەلدىڭ اراسىنداعى تۇيتكىلدى پروبلەمالاردى شەشۋگە باعىتتالعان جول كارتاسىن قاراستىراتىندىعىن ايتتى.
«شەكاراعا ەكى جاقتان دا باقىلاۋ قويامىز. قازاقستاننان دا، قىرعىستاننان دا. ە ا ە و- دان ءۇش ادام ءاربىر جۇكتى قارايدى، ءبىراق وتكىزە بەرەتىن بولادى. سونداي باقىلاۋدى ءبىز قىتايدىڭ شەكاراسىندا دا جاسايمىز»، - دەدى نۇرسۇلتان نازاربايەۆ.
قازاقستان پرەزيدەنتى مۇنان بولەك، قىرعىز ارىپتەسىن ەلىمىزگە رەسمي ساپارمەن كەلۋگە شاقىرعانىن دا اتاپ ءوتتى.
«جاڭادان سايلانعان قىرعىزستان پرەزيدەنتى سوورونباي ءشارىپ ۇلىن مەن قازاقستانعا رەسمي ساپارمەن شاقىرىپ وتىرمىن. سول كەلگەندە بارلىق شارۋانى ارتقا تاستاپ، قازاق پەن قىرعىز اراسىنداعى جاعدايدى تۇزەتەتىن بولايىق دەپ كەلىستىك»، - دەدى ەلباسى.
ءوز كەزەگىندە قىرعىزستان پرەزيدەنتى باۋىرلاس قازاق ەلىنە جاقسىلىقتار تىلەيتىندىگىن باسا ايتتى.
«ورىن العان پروبلەمالار بويىنشا سويلەسىپ، شەشىمگە كەلدىك. جول كارتاسى بار، ەكى ەلدىڭ ۇكىمەتتەرى ءازىر ونى جاسايدى. سودان كەيىن كوپ ماسەلە شەشىلەدى. شەكاراعا ە ا ە و- قازاق- قىرعىز تاراپىنان باقىلاۋ قويماساق، بولمايدى دەپ شەشتىك. بۇل پروبلەمالاردىڭ ءبارى - شەشىلەتىن ماسەلەلەر. مەن جاۋاپكەرشىلىك الىپ وتىرمىن. كوپ ماسەلە بار، ونى ەكى تاراپتان شەشەمىز. راحمەت، نۇرسۇلتان ءابىش ۇلى»، - دەدى سوورونباي جەەنبەكوۆ.
ايتا كەتەيىك، ەكىجاقتى كەزدەسۋ قىرعىز تاراپىنىڭ وتىنىشىمەن ءوتتى.
