وڭتۇستىك قازاقستاندا ايتەكە بيگە ەسكەرتكىش ورناتىلدى
جيىنعا قاتىسۋشىلار ايتەكە ءبيدىڭ قايراتكەرلىگى مەن دانالىعىن ءسوز ەتىپ، ۇلت ماقتانىشىنا اينالعان ءىرى تۇلعانىڭ بۇگىنگى ۇرپاققا بەرەر ونەگەسى مەن تاعىلىمىن باياندادى.
«ءاز تاۋكەنى تاققا وتىرعىزىپ، قازاق حاندىعىندا بەيبىت كۇن ورناتۋعا ات سالىسقان ايتەكە بي - تاريحتاعى ايتۋلى تۇلعا. قازاق تاريحىندا التىن ارىپپەن تاڭبالانعان زاڭعار تۇلعانىڭ ەلى ءۇشىن ەتكەن ەڭبەگى ءالى كۇنگە ەل اۋزىندا. ءامىر تەمىر وسيەتتەرى مەن قولباسشىلىق ونەرىن جەتىك مەڭگەرگەن ول، 36 جاسىندا تۇركىستاندا ءاز تاۋكەنىڭ حان بولىپ سايلانۋىنا ۇلكەن ىقپال ەتەدى. ەل نامىسىن كوزدىڭ قاراشىعىنداي قورعاعان تۇلعانى تانۋ ارقىلى جاس بۋىن بويىنا قايراتكەرلىك، وتانسۇيگىشتىك قاسيەتتەردى سىڭىرەدى. كۇرە جولدىڭ بويىندا ەڭسە تىكتەگەن داڭقتى ءبيدىڭ ەسكەرتكىشى ەل بىرلىگىنىڭ سيمۆولى بولا بەرمەك»، - دەدى بەلگىلى عالىم ەركىن قانجىگىتوۆ.
ەسكەرتكىشتىڭ اشىلۋ سالتاناتىنان كەيىن وتكەن «ىرىس الدى - ىنتىماق» فورۋمىندا اۋدان اكىمى قايرات ابدۋاليەۆ ءسوز سويلەپ، تولە، قازىبەك، ايتەكە بيلەردىڭ بۇقارا حالىقتى ىنتىماق پەن بىرلىككە ۇندەگەن ەرەن ەڭبەكتەرىن اتاپ ءوتتى.
شاراعا قاتىسقان قازاقستان رەسپۋبليكاسىنا ەڭبەگى سىڭگەن زاڭگەر، زاڭ عىلىمدارىنىڭ دوكتورى، پروفەسسور بەكەت تۇرعارايەۆ « ۇلىلاردى ۇلىقتاۋ - ۇرپاقتىڭ پارىزى» تاقىرىبىندا بايانداما جاساسا، عالىم ەركىن قانجىگىتوۆ ۇرپاق ساباقتاستىعىنىڭ ماڭىزىنا توقتالدى. سونداي- اق فورۋمدا ءسوز سويلەگەن مەملەكەت جانە قوعام قايراتكەرى شالاتاي مىرزاحمەتوۆ پەن وبلىستىق ارداگەرلەر كەڭەسىنىڭ ءتوراعاسى جەڭىسبەك ماۋلەنقۇلوۆ، اقىن حانبيبى ەسەنقارا قىزى ەل بىرىلىگى، ۇلت ىنتىماقتىعى تۋرالى كەلەلى ويلارىن ورتاعا سالدى.
فورۋم سوڭىندا ايتەكە ءبيدىڭ رۋحىنا ارنالعان ارنايى اس بەرىلدى.
