ەركە ەسماحان «نۇر وتاننان» قانداي سىيلىق الدى
وسىعان بايلانىستى پارتيا ءتوراعاسىنىڭ ءبىرىنشى ورىنباسارى مۇحتار قۇل- مۇحاممەد تانىمال انشىگە پارتيالىق بيلەتپەن بىرگە ەستەلىك سىيلىقتى دا تابىستادى، دەپ حابارلايدى قازاقپارات ءتىلشىسى.
«مەن بۇگىنگى كۇندى جاقسىلىققا جورىپ تۇرمىن. ءوزىمنىڭ تۋعان كۇنىمدە وسىنداي ۇلكەن قۋانىشقا كەنەلىپ جاتىرمىن. ەلىمىزدەگى ەڭ بەدەلدى پارتياعا ءوتۋ - مەن ءۇشىن ۇلكەن قۋانىش جانە ۇلكەن جاۋاپكەرشىلىك... الدا بارلىق ۇمىتتەردى اقتايمىن دەگەن ويدامىن... شىنىمدى ايتسام، قوبالجىپ تۇرمىن»، - دەدى ەسماحان سالتاناتتى شارا بارىسىندا.
رەسمي بولىمنەن كەيىن ءانشى قازاقپارات تىلشىسىنە ءوزىنىڭ سىيلىعىن كورسەتتى. شاعىن قوراپتىڭ ىشىندە قولساعات، قالام مەن ۆيزيتكا سالاتىن ساۋىت بار. «بۇل قىمبات مەتالدان جاسالعان بۇيىمدار ما؟» - دەپ سۇراعانىمىزدا ەركە ەسماحان: «ءيا، التىن، بريلليانت»، - دەپ جاۋاپ بەردى. الايدا «نۇر وتاننىڭ» وكىلدەرى اتالعان بۇيىمداردىڭ قۇرامىندا قىمبات مەتالدىڭ جوقتىعىن، ونىڭ تەك ەستەلىك كادەسىي ءۇشىن عانا جاسالعانىن جەتكىزدى.
ايتا كەتەيىك، بۇگىن «نۇر وتان» پارتياسىنىڭ قاتارىنا كاسىبي بوكسشى جانات جاقيانوۆ، وليمپيادا جۇلدەگەرى، اۋىر اتلەت كارينا گوريچەۆا، ءانشى تورەعالي ءتورالى، جاس عالىم اۋەسحان وسپانوۆ، «ديپلوممەن اۋىلعا» باعدارلاماسىنىڭ قاتىسۋشىسى احمەت ماگومەدوۆ، ناركولوگيا مەن پسيحوتەراپيا ورتالىعى باسشىسىنىڭ ورىنباسارى الۋا ماساليموۆا، ينجەنەر- تەحنولوگ دميتري بابىليەۆ، فەرمەر ەگەمەن جۇماعالي، مەحانيك نيكولاي ولەينيكوۆ، بالالار ءۇي ديرەكتورىنىڭ ورىنباسارى ۆەرونيكا ۆلاسوۆا، ارحەولوگ ايبار قاسەنالين، ينتەللەكتۋالدىق ويىنداردىڭ قاتىسۋشىسى ءۋاليحان تۇراربەك ۇلى مەن «بولاشاقتىڭ» تۇلەگى جالعاس بەرىك ۇلى قابىلداندى. اتالعان شارا ق ر تۇڭعىش پرەزيدەنتى كۇنىنە ارنالىپ وتىر.
