تورەعالي مەن ەركە سىندى ءبىر توپ جاستار «نۇر وتاننىڭ» قاتارىنا كىردى - فوتو
اتالعان شارا ق ر تۇڭعىش پرەزيدەنتى كۇنىنە ارنالىپ وتىر، دەپ حابارلايدى قازاقپارات ءتىلشىسى.
سالتاناتتى شارا بارىسىندا پارتيا ءتوراعاسىنىڭ ءبىرىنشى ورىنباسارى مۇحتار قۇل-مۇحاممەد 15 ادامعا ارنايى كۋالىكتەردى تابىستادى. ولاردىڭ ىشىندە تانىمال بوكسشى جانات جاقيانوۆ، اۋىر اتلەت كارينا گوريچيەۆا، انشىلەر تورەعالي ءتورالى مەن ەركە ەسماحان، جاس عالىمدار جانە باسقا دا بەلسەندىلەر بار. مۇحتار ابرار ۇلى پارتيالىق بيلەت تاپسىرۋدى تورەعالي تورالىدەن باستادى.
ءوز سوزىندە تورەعالي پارتيا باسشىلىعىنا ءوز العىسىن ءبىلدىرىپ، ۇلكەن جاۋاپكەرشىلىكتى ەندى سەزىنىپ جاتقانىن جەتكىزدى. ەركە ەسماحاندى بۇگىنگى تۋعان كۇنىمەن دە قۇتتىقتاۋدى دا ۇمىتپادى. ۇيىمداستىرۋشىلار ەكى ءانشىنى بولمەي، تورەعاليدەن كەيىن كەلەسى پارتيالىق بيلەتتى ەركە ەسماحانعا تابىستادى.
«نۇر وتان» پارتياسى ءتوراعاسىنىڭ ءبىرىنشى ورىنباسارى مۇحتار قۇل-مۇحاممەد ءبىرقاتار قازاقستاندىق انشىلەردى ەرەكشە اتاپ ءوتتى. «مەن تورەعالي ءتورالى مەن قايرات نۇرتاستى ءبىر قاسيەتى ءۇشىن ايرىقشا سىيلايمىن. 90-جىلدارى قازاقستانعا داۋىسى بارى دا، جوعى دا فونوگراممامەن كەلىپ، 30-40 مىڭدىق اۋديتوريانى تولتىرىپ كەتەتىن. بۇلار ءوز كۇشىمەن تولتىردى. قازاقستاندا عانا تولتىرعان جوق، بەيجىڭدە دە تولتىردى، موڭعوليادا دا تولتىردى، ەۋروپانىڭ تورىندە دە تولتىردى. ەركەنى الايىق، ارينە، قازاقتىڭ تاريحىندا عاجاپ انشىلەر بولعان. دەگەنمەن، ءبىر ءاندى كورۋ كورسەتكىشىن 40 ميلليونعا جەتكىزۋ - ۇلكەن جەتىستىك. ونداي ادامدار ءبىزدىڭ قاتارىمىزدا بولۋى قاجەت»، - دەپ اتاپ كورسەتتى مۇحتار ابرار ۇلى.
ايتا كەتكەن ءجون، شارا كەزىندە «نۇر وتانعا» وتكەن جاستار ەكىگە ءبولىنىپ تۇردى. تورەعالي مەن ەركە ءبىر قاتارعا ورنالاسپاي، ءبىر-بىرىنە قارسى تۇردى.
