استانادا تۇرىك شايى فەستيۆالى وتەدى
بۇل شارانى ورتالىق تۇركيانىڭ قازاقستانداعى ەلشىلىگىنىڭ قولداۋىمەن ۇيىمداستىرىپ وتىر.
شاي تۇرىك اسحاناسىنىڭ ايرىلماس ءبىر بولشەگىنە اينالعان. تۇرىك شايى باسقا شايلاردان تروپيكالىق ايماقتاردا وسپەيتىندىگىمەن ەرەكشەلەنەدى. الەمدە كونتينەنتتىك اۋا رايىندا شاي ءوسىرۋ ءداستۇرى تەك تۇركيادا عانا كەزدەسەدى.
شايدى ەرەكشە كورەتىن تۇرىك حالقى ورتا ەسەپپەن جىلىنا ءار ادام باسىنا شاققاندا 2,3 كەلى شاي تۇتىنادى ەكەن. وسىلايشا بۇكىل الەمدە ەڭ كوپ شاي ىشەتىن حالىقتار اراسىندا ءتورتىنشى ورىندى يەلەنەدى. ءبىر عاسىر بۇرىن كوفەسىز كۇندەرى وتپەيتىن تۇرىك حالقىنىڭ قازىرگى تاڭدا شىنى ىدىسپەن شاي ىشپەسە تاڭى اتپايدى دەسەك ارتىق ايتپايمىز.
تۇرىك حالقى ءۇشىن شايعا ارنالعان شىنى ىدىستىڭ ورنى بولەك. تۇرىكتەر ءۇشىن شاي ءىشۋ دە ءبىر ونەر. مىسالى، شايدىڭ دەمدەلۋىن، رەڭىن جانە قاسىقپەن ارالاستىرعان كەزدە شىعاتىن وزىندىك دىبىستاردىڭ ءار قايسىسىن سەزىنە ءبىلۋ كەرەك.
شاي - ادامدار اراسىنداعى اڭگىمە- دۇكەننىڭ باستالىپ، ودان ءارى قاراي وربۋىنە سەپتىگىن تيگىزەتىن ءبىر دانەكەر. يۋنۋس ەمرە اتىنداعى تۇرىك مادەنيەت ورتالىعى جۇرتشىلىقتى تۇرىك جانە قازاق حالىقتارى اراسىنداعى باۋىرلاستىقتى ارتتىرۋ ماقساتىندا تۇرىك شايىن ىشۋگە جانە شايدىڭ 15 ءتۇرى مەن تۇرىك سيميتىنىڭ ءدامىن تاتۋعا شاقىرادى.
