ەرنار سادىربايەۆ چەحيادا حالىقارالىق ءان بايقاۋىنان ەكى بىردەي جۇلدەنى ۇتىپ الدى
- جەڭىس قۇتتى بولسىن! قاتەلەسپەسەك، چەحيادا ەكى بىردەي جارىستا وزىق شىقتىڭىز. قاي ەلدەردىڭ ونەرپازدارىمەن سىنعا ءتۇستىڭىز؟
- راحمەت! الدىمەن، رەسەي فەدەراتسياسىنىڭ چەحياداعى ەلشىلىگىنىڭ ۇيىمداستىرۋىمەن وتكەن شاراعا قاتىستىم. شارتى بويىنشا تەك قانا ورىس تىلىندەگى ولەڭدەردى ايتۋ كەرەك بولدى. ءبىرىنشى تۋردا - «انگەل»، ەكىنشىسىندە «نا كونتينەنتى» دەگەن اندەردى شىرقادىم. ءسويتىپ، قازىلار القاسىنىڭ جوعارى ۇپايىن يەلەندىم.
ەكىنشى حالىقارالىق ۆوكال بايقاۋى «Diamond voice festival-2017» دەپ اتالادى. راسىن ايتۋ كەرەك، بۇل سىننىڭ ءباسى جوعارى بولدى. سەبەبى، يسپانيا، بولگاريا، گرۋزيا، انگولا، رەسەي، چەحيا، كولۋمبيا سىندى ەلدەردىڭ «مەن» دەگەن ونەرپازدارى كەلدى. شىنىمدى ايتسام، الەكساندر موروزوۆ، برۋنو ەلۋشيچ، كاميلا حيۋبش، حۋان لوپەس سياقتى ەسىمدەرى تانىلىپ قالعان انشىلەردىڭ اراسىنان باس جۇلدە ماعان بۇيىرادى دەپ ويلامادىم. قۋانىشىمدا شەك جوق!
- «Diamond voice festival-2017» قازىلارىن قانداي اندەرىڭىزبەن تاڭعالدىردىڭىز؟
- بۇل بايقاۋ دا ەكى كەزەڭنەن تۇردى. اۋەلى، موتسارتتىڭ ايگىلى Je dour ser der roses ميۋزيكلىن ورىندادىم. شەشۋشى كەزەڭدە ءوزىمىزدىڭ «قۇسني-قورلاندى» الىپ شىقتىم. وسى ولەڭدى گەرمانيادا بولعان «BerlinePerle-2014» سايىسىندا دا ورىنداپ، ۇزدىك ۇشتىكتەن كورىنگەنمىن.
- «قۇسني- قورلان» ءانىن تاڭداۋىڭىزعا نە سەبەپ بولدى؟
- مەنىڭشە، ارقا مەكتەبىنە ءتان سال-سەرىلىك ءداستۇردىڭ سارقىتى ەستاي بەركىمباي ۇلىنىڭ ەسىمىن بىلمەيتىن قازاق كەمدە-كەم شىعار. ونىڭ ماحاببات ءانۇرانى سانالاتىن اتاقتى «قۇسني- قورلانى» ءوزىمنىڭ ءسۇيىپ شىرقايتىن انىمە اينالدى. جالپى، وسى ءاننىڭ تاريحى وزىمە ۇنايدى. سۇراعان كىسىلەرگە ساپارعالي بەگاليننىڭ 1939 -جىلى ەستايدىڭ ءوز اۋزىنان جازىپ العان ءسوزىن ايتىپ بەرەمىن.
- ءداستۇرلى سۇراق: ونەر جولىنا قالاي كەلدىڭىز؟
- انشىلەردىڭ كوبى مەكتەپ قابىرعاسىنان-اق ءوز جولىن تاڭداپ قوياتىن بولار. مەنىكى دە وسىلاي باستالدى. قوستاناي قالاسىندا وقىدىمى. ءان-ساز ءپانىنىڭ مۇعالىمى انگە دەگەن جاقىندىعىمدى بايقاپ، قالالىق جارىستارعا قاتىستىرىپ ءجۇردى. كەيىن 7 جىل مۋزىكا مەكتەبىن اياقتادىم. ق ر ەڭبەك سىڭىرگەن ءارتىسى الەكساندر كالۋگيننىڭ ءتالىمىن الدىم. ارينە، انشىلىككە جول باستاۋشى بولعان ت. جۇرگەنوۆ اتىنداعى ونەر اكادەمياسى ەكەنى داۋسىز.
- باسقا قانداي حالىقارالىق بايقاۋلارعا قاتىستىڭىز؟
- الىس- جاقىن شەت ەلدەردىڭ دارىندىلارىن جيعان «التىن ميكروفون»، «بوزتورعاي» بايقاۋلارىنىڭ جۇلدەسىنە يە بولدىم. ودان بولەك، «دەلفي ويىندارى» كونۋرسىنىڭ لاۋرەاتى اتاندىم. رەسەيدەگى ءان بايقاۋلارىندا بىرنەشە رەت باق سىنادىم. ناتيجەلەرى دە جامان ەمەس. ميلاندا وتكەن «ەكسپو-2015» حالىقارالىق كورمەسىندە ءان ايتۋ قۇرمەتىن يەلەندىم.
- ءبىر سۇحباتىڭىزدا اناڭىزعا ارناپ ءان جازعىڭىز كەلەتىنىن ايتىپ ەدىڭىز...
- «ارمان دەگەن كوپ بەلەس: بىرىنە شىقساڭ - ءبىرى بار». قالاي بولعاندا دا، بالالىق بورىشىمنىڭ ءبىر پۇشپاعىن وسىلاي وتەگىم كەلدى. وعان دا قول جەتتى. «اناشىم» اتتى انىمە بەينەبايان دا ءتۇسىرىلدى.
- ەندىگى ارمانىڭىز نە؟
- انشىلەر ۇنەمى ىزدەنىستە ءجۇرۋى ءتيىس. انشىلىك شەبەرلىكتى شىڭداۋدىڭ سىرتىندا، كەز- كەلگەن اسپاپتىڭ ءتىلىن يگەرۋدى ماقسات تۇتامىن. ال ازامات رەتىندەگى ارمانىم - قازاقستان بايراعىن ءوز ونەرىممەن بيىكتەتۋ.
اۆتور: باتىر جولاي ۇلى
