بەردىبەك ساپاربايەۆ: ءوتىنىش - باعانى كوتەرمەڭىزدەر - فوتو
اقتوبە وبلىسىنىڭ اكىمى بەردىبەك ساپاربايەۆ ءىرى ساۋدا جەلىلەرىنە، «تابىس» قالالىق كوممۋنالدىق بازارىنا باردى.
«ءوتىنىش - باعانى كوتەرمەڭىزدەر. كەرىسىنشە، مەرەكە قارساڭىندا، اسىرەسە، الەۋمەتتىك ماڭىزى بار تاۋارلاردىڭ باعاسىن تومەندەتىپ، حالىققا قولداۋ كورسەتىڭىزدەر. سىزدەردىڭ ساۋدا ۇستەمەلەرىڭىز 5 پايىزدان اسپاۋى ءتيىس»، - دەدى بەردىبەك ساپاربايەۆ.
اقتوبە وبلىسى اكىمىنىڭ باسپا ءسوز قىزمەتىنىڭ حابارلاۋىنشا، ءىرى ساۋدا جەلىلەرىنىڭ باسشىلارى بۇل باستامانى قولدايتىندىقتارىن ءبىلدىردى. ولار جەلتوقسان ايىنداعى مەرەكەلەر قارساڭىندا ساۋدا ورىندارىندا ءتۇرلى اكتسيالار جۇرگىزەتىن بولدى. سونىمەن قاتار، كوكونىس، ەت، جۇمىرتقا، ءسۇت جانە ءسۇت ونىمدەرى، ماي، ماكارون، جارما مەن باسقا دا ونىمدەردىڭ باعاسى تومەندەدى. جىلىجاي كەشەندەرىنىڭ ونىمدەرى دەلدالسىز سۋپەرماركەتتەرگە جەتكىزىلىپ جاتىر.
بەردىبەك ساپاربايەۆ سوڭعى كەزدە اقتوبەلىكتەردىڭ الەۋمەتتىك جەلىلەردە جەكەلەگەن تاۋارلاردىڭ كەم ولشەنەتىنىنە شاعىمداناتىندارىن اتاپ ءوتتى.
ساۋدا ۇيلەرىنىڭ باسشىلارى بولاشاقتا مۇنداي جاعدايلاردى بولدىرماۋ ماقساتىندا ءاربىر سۋپەرماركەتتە تەكسەرۋ تارازىلارىنىڭ قوندىرىلعانىن ايتتى. ءوڭىر باسشىسى ءوزىنىڭ ورىنباسارى ماۆر ابدۋللين مەن اقتوبە قالاسىنىڭ اكىمى ءىلياس يسپانوۆقا ايتىلعان ماسەلەلەردى نازاردا ۇستاۋدى تاپسىردى.
ايتا كەتەيىك، «انۆار» جانە «دينا» ساۋدا جەلىلەرى قالا تۇرعىندىرىنىڭ %75 ازىق- تۇلىك تاۋارلارىمەن قامتاماسىز ەتىپ وتىر. بۇگىنگى كۇنى اقتوبە وبلىسىنىڭ تۇراقتاندىرۋ قورىندا 1100 توننا كارتوپ، 200 توننا ءسابىز، 100 توننا ورامجاپىراق جانە 200 توننا پياز ساقتالعان. بۇل ونىمدەر تومەندەتىلگەن باعامەن ساتىلادى.
