بۇرىنعى كۇيەۋىن جەلى ارقىلى بالاعاتتاعان ايەل سوتقا تارتىلدى
اقتوبە وبلىسى، قارعالى اۋداندىق سوتى الەۋمەتتىك جەلى ارقىلى ءبىر-بىرىمەن ۇرىسىپ، بالاعات ءسوز ايتقان ەرلى-زايىپتىعا قاتىستى ءىستى قارادى.
ءىس ماتەريالىنا سۇيەنسەك، مارينا تانابەرگەنوۆاعا قىلمىستىق كودەكستىڭ «قورلاۋ» بابى بويىنشا ايىپ تاعىلدى. ايىپتالۋشى م. تانابەرگەنوۆا جابىرلەنۋشى ر. تانابەرگەنوۆكە «WhatsApp» جەلىسى ارقىلى بالاعات سوزدەر جىبەرەدى.
حابارلامادا ول بۇرىنعى كۇيەۋىن قاڭعىباسقا، ەسەككە تەڭەگەن. ءسويتىپ، كودەكستىڭ قورلاۋ، ياعني، باسقا ادامنىڭ ابىرويى مەن قادىر-قاسيەتىن ادەپسىز تۇردە كەمسىتۋ تارماعى بويىنشا ساراپتاما تاعايىندالىپ، حابارلاماداعى سوزدەر تەكسەرىلدى. سوت وتىرىسى كەزىندە م. تانابەرگەنوۆا ءوزىنىڭ ايىبىن تولىق مويىنداپ، وكىنەتىنىن جەتكىزدى.
ال جابىرلەنۋشى ر. تانابەرگەنوۆ بۇرىنعى ايەلى ءوزىن، بالالارىن، تۋعان-تۋىستارىن ۇنەمى بالاعاتتايتىنىن ايتىپ بەردى. سوت وتىرىسى كەزىندە كۋاگەرلەر دە بۇرىنعى ەرلى-زايىپتىلاردىڭ ۇنەمى ۇرىسىپ، جالجالداساتىنىن جاسىرمادى.
سوت ۇكىمىمەن مارينا تانابەرگەنوۆا ايىپتى دەپ تانىلىپ، وعان 56725 تەڭگە مەملەكەتتىك شىعىندى وتەۋ مىندەتتەلدى. ال ازاماتتىق ارىز بويىنشا ايىپتالۋشى بۇرىنعى كۇيەۋى رۋستام تانابەرگەنوۆكە 10 مىڭ تەڭگە مورالدىق زيان تولەيدى. سوت ۇكىمى كۇشىنە ەنگەن جوق.
ايتا كەتەيىك، ايىپتالۋشى م. تانابەرگەنوۆانىڭ بۇرىنعى كۇيەۋى ر. تانابەرگەنوۆ مورالدىق شىعىن رەتىندە 600 مىڭ تەڭگە تالاپ ەتكەن بولاتىن. سوت ايىپتالۋشىنىڭ وكىنەتىنىن، كامەلەتكە تولماعان بالالارىنىڭ بار ەكەنىن ەسكەردى. سونىمەن قاتار، ازاماتتىق ارىز بويىنشا ايىپتالۋشى مەملەكەتكە 48150 تەڭگە تولەيدى.
