شىعىس قازاقستان اكىمى ەلدى مەكەندەردىڭ اتاۋلارىن قازاقشالاندىرۋعا قاتىستى پىكىر ءبىلدىردى
بۇل تۋرالى و ك ق- دا وتكەن باسپا ءسوز ءماسليحاتى بارىسىندا ش ق و اكىمى دانيال احمەتوۆ ءمالىم ەتتى، دەپ حابارلايدى «قازاقپارات» ح ا ا ءتىلشىسى.
باسپا ءسوز ءماسليحاتى بارىسىندا وبلىس اكىمىنە ەلدى مەكەندەردىڭ اتاۋىن قازاقشالاندىرۋعا قاتىستى ساۋال قويىلدى.
«وسى جۇمىستى اسىقپاي قاراستىرىپ جاتىرمىز. از ۋاقىتتىڭ ىشىندە ءبىر اۋدانعا باسقاشا اتاۋ بەرىلەدى. ءبىراق تا ءبىز ۇلتتىق ماسەلە - ۇلكەن ماسەلە ەكەنىن ءبىلۋىمىز كەرەك. ماسەلەن، شەمونايحا اۋدانىندا حالىقتىڭ 20 پايىزى قازاقتار بولسا، 80 پايىزى باسقا ۇلتتار. سوندىقتان، ءبىز اسىقپاي جۇمىس ىستەۋىمىز كەرەك. تەك قانا ءبىر جاققا باسىمدىق بەرۋگە بولمايدى»، - دەيدى ول.
دانيال احمەتوۆ ءوز سوزىندە بۇل سۇراقتىڭ ءوزىنىڭ جەرلەستەرى ءۇشىن دە ماڭىزدى ەكەنىن تىلگە تيەك ەتتى.
«ءسوزسىز، ءبىز البەتتە ونوماستيكامەن اينالىسۋىمىز كەرەك. ءيا، گلۋبوكوە اۋدانىندا ءبىرقاتار اتاۋلار ءالى دە ورىسشا. شەمونايحا اۋدانىندا دا سونداي. ءبىراق، سول اۋدانداردىڭ مۇددەلەرىن دە ەسكەرۋىمىز كەرەك قوي. البەتتە، ءبىزدىڭ ءبىرقاتار ەلدى مەكەندەر ءوزىنىڭ تاريحي اتاۋلارىن قايتارادى. بۇل گلۋبوكوە، شەمونايحا، زىريان اۋدانىنىڭ بارىنە قاتىستى. ءبىراق، سونىمەن بىرگە ءبىز بۇل ىسكە شىنايىلىقپەن كەلۋىمىز كەرەك. سوندىقتان، اتاۋلاردى وزگەرتۋ ماسەلەسىنە ءبىز باپپەن كەلەمىز»، - دەيدى وبلىس اكىمى.
