اكەسى ديماشتىڭ كوپشىلىك بىلەبەرمەيتىن ونەرى جايلى ايتتى
كومپوزيتور، ءانشى، ديماش قۇدايبەرگەننىڭ اكەسى قانات ايتبايەۆ «تاڭشولپان» باعدارلاماسىندا قوناقتا بولىپ، ونەردەگى جاڭالىقتارىمەن ءبولىستى.
«ءبىزدىڭ شىعارماشىلىق باعىتىمىز قازىر ديماشتىڭ جولىمەن تىكەلەي بايلانىستى. ديماش حالىقارالىق ءىس-شارالارعا دايىندالىپ جاتىر.
بيىل ماۋسىم ايىندا ەلىمىزدە باستالعان شوۋ-كونسەرت جالعاسىن تابادى. جوسپار بويىنشا 16-جەلتوقساندا قىتايدا چاڭشا قالاسىندا ۇلكەن كونسەرت بەرەدى. سول كونسەرتكە قازىر حالىقارالىق دەڭگەيدەگى سازگەر، رەجيسسەر، بيشىلەر توبىمەن ازىرلىك ءجۇرىپ جاتىر»، - دەپ حابارلادى ايتبايەۆ.
سونداي-اق ول ءانشى ءۇشىن فيزيكالىق دايىندىقتىڭ ماڭىزىن جانە ديماشتىڭ قانداي سپورتپەن شۇعىلداناتىنىن ايتتى.
«جالپى، ءان ايتۋ ءۇشىن ادام فيزيكالىق تۇرعىدا مىقتى بولۋى كەرەك. كەيدە ديماشتى نازىك كورىنەدى دەپ ايتىپ جاتادى، ءبىراق ونداي ەمەس، ول سپورتپەن وتە جاقسى شۇعىلدانعان جىگىت. جۇزۋمەن كوپ شۇعىلداندى، شىعىس جەكپە-جەگىمەن دە اينالىسقان كەزدەرى بولدى. بارىنشا قارۋلى جىگىت.
ءانشىنىڭ ساحنادا وزىنە سەنىمدىلىگى فيزيكالىق تۇرعىداعى كۇشىمەن ۇشتاسىپ جاتۋى كەرەك. ءان ايتقاندا ديافراگما مىقتى بولۋى كەرەك، وكپەنىڭ تىنىس الۋ كولەمى دە ۇلكەن بولۋى قاجەت. قازىر كونسەرتكە كۇنىنە ءتورت-بەس ساعات ءبي دايىنداپ جاتىر. ال بۇل ۇلكەن فيزيكالىق دايىندىقتى قاجەت ەتەدى»، - دەدى ول.
