قانات يسلامنىڭ كەلەسى قارسىلاسى دجون ۆەرا تۋرالى نە بىلەمىز - فوتو، كەسكىن
بۇگىن بۇكىل الەمدىك بوكس كەڭەسى (WBA) وتانداسىمىزعا كەلەسى مىندەتتى قارسىلاسىن بەلگىلەدى. ول - رەيتينگتە ەكىنشى ورىندا تۇرعان امەريكالىق بوكسشى دجون ۆەرا.
ۆەرا مەن يسلام ءبىرىنشى ورتا سالماقتاعى WBA چەمپيونىنىڭ مىندەتتى قارسىلاسى اتانۋ ءۇشىن جەكپە-جەك وتكىزۋ كەرەك. وسى ورايدا Vesti.kz پورتالى ءالى جەڭىلىپ كورمەگەن بوكسشى تۋرالى كەڭىرەك مالىمەت بەرۋدى ءجون كورىپ وتىر.
ۆەرا بوكسپەن 11 جاسىندا شۇعىلدانا باستاپتى. ءبىراق، ونىڭ اۋەسقوي بوكستاعى تابىسىن اۋىز تولتىرىپ ايتا المايمىن. بوكسشىنىڭ ايتۋىنشا، جاس كەزىندە ول ءتىپتى اقشا تابۋ ءۇشىن بوكستى تاستاپ، باسقا تىرلىكپەن شۇعىلدانعىسى دا كەلگەن. دەگەنمەن كەيىننەن ول ءومىرىن بوكسپەن بايلانىستىراتىن بولىپ شەشەدى.
ابىروي مەن اتاققا قول جەتكىزگەنگە دەيىن دجون ءبارىبىر دە بوكس پەن قوسالقى جۇمىستى قاتار الىپ ءجۇردى. ول تەحاس شتاتىنداعى قاراپايىم زالداردىڭ بىرىندە جاتتىعۋ جاساپ ءجۇردى. ءبىراق ۋاقىتىنىڭ كوپ بولىگى قوسالقى جۇمىسقا كەتكەن ەدى. ويتكەنى، ول پاتەرىنىڭ اقشاسىن جانە قوسىمشا شىعىندارىن جابۋى كەرەك بولاتىن.
دجون كاسىپقوي بوكسقا 23 جاسىندا اۋىسقان. ونىڭ كوماندالاستارىنىڭ ايتۋىنشا، ۆەرا دەر كەزىندە كاسىپقوي بوكسقا اۋىسقان ەكەن. ءدال وسى شاعىندا ول بارلىق مۇمكىندىكتەرىن تولىعىمەن كورسەتە باستاعان.
«فەنومەن» (دجون ۆەرانىڭ لاقاپ اتى) تەحاس شتاتىنىڭ فورت ۋەرت قالاسىندا دۇنيەگە كەلگەن. بارلىق عۇمىرىن امەريكادا وتكىزگەن جانە تابىستارىنىڭ بارلىعىن وتانداستارىمەن بايلانىستىرادى. «مەنىڭ قالامنىڭ تۇرعىندارى جەتىستىكتەرىممەن ماقتان تۇتسا دەيمىن»، - دەيدى سۇحباتتارىنىڭ بىرىندە ۆەرا.
ۆەرانىڭ اكەسىنىڭ تۋىستارى پۋەورتوريكادان شىقسا، اناسىنىڭ تۋىستارى مەكسيكالىقتار.
ۆەرا وتباسىنىڭ كىشى ۇلى. ونىڭ اعالارى مەن اپكەلەرى بار. ءاۋ باستا ونىڭ اناسى بوكسپەن شۇعىلدانۋعا تۇبەگەيلى قارسى بولعان. ءبىراق ونىڭ اناسى كاسىپقوي بوكستاعى ءاربىر كەزدەسۋىن قالدىرماي كورىپ كەلەدى. قازىرگى تاڭدا ول ۆەرانىڭ كومانداسىنىڭ قاتارىندا.
«اناممەن كۇن سايىن سويلەسىپ وتىرامىن. قازىر ول مەنىڭ كوماندامنىڭ ءبىر بولىگى. ول مەنىڭ جەكپە-جەك الدىنداعى تاماقتارىمدى دايىندايدى. مەنىڭ جەكە ديەتولوگىم. بۇرىندارى ول بوكستى مۇلدە ۇناتپايتىن بولسا، قازىر ول ارەناداعى ەڭ قاتتى ايقايلاپ وتىراتىن ادامداردىڭ بىرىنە اينالدى. ۇنەمى ايقايلاپ، مەنى قولداپ وتىرادى»، - دەيدى ۆەرا اناسى تۋرالى.
ۆەرانىڭ كارەراسىنداعى ەڭ ماڭىزدى كەزەڭدەردىڭ ءبىرى قازاق بوكسىمەن بايلانىستى. 2015-جىلى ول تاعى ءبىر وتانداسىمىز رادمير احمەديەۆپەن كەزدەستى. ول كەزدەسۋدە ۆەرا نوكاۋتپەن جەڭىسكە جەتتى. بۇل جەڭىس دجونعا كىشى روي دجونستىڭ كومانداسىمەن كەلىسىمشارت جاساۋعا مۇمكىندىك بەردى. روي دجونسپەن كەلىسىمشارت جاساعاننان كەيىن ول وزىنە جاڭا بەلەستەردى اشتى.
«ول جەڭىس مەنىڭ كارەرامدى كەرەمەت وزگەرتىپ جىبەردى. احمەديەۆتى جاڭا گەننادي گولوۆكين دەپ ءجۇردى جۇرتىشىلىق. ول جىگىتتەن كوپ ءۇمىت كۇتتى. ءبىراق مەن ول كەزدەسۋدە كەرەمەت سوققى جاساي الدىم. وسى جەڭىستەن كەيىن مەن ءۇشىن جاڭا بەلەستەر اشىلدى»، - دەيدى امەريكالىق بوكسشى.
ۆەرانىڭ الداعى جوسپارلارىنىڭ ىشىندەگى ەڭ ماڭىزدىسى - ءبىرىنشى ورتا سالماقتاعى چەمپيوندىق بەلبەۋ ءۇشىن جەكپە-جەك. بۇل مەجەگە جەتكەننەن كەيىن ول سالماعىن اۋىستىرۋعا نيەتتى.
بۇرناعى كۇنى ۆەرا WBA- NABA USA بەلبەۋىنىڭ يەگەرى. سولاقاي بوكسشى. وتە مىعىم. ءىرى دەنەلى. سونىمەن قاتار ماماندار ۆەرانىڭ قارسىلاستىڭ مۇمكىندىگىن كەرەمەت باقىلاي الاتىن بوكسشى دەپ باعامدايدى. WBA رەيتينگىندە ەكىنشى ورىندا تۇر. كاسىپقوي بوكستا 18 كەزدەسۋ وتكىزگەن. ونىڭ بارلىعىندا جەڭىسكە جەتكەن 11 كەزدەسۋدە قارسىلاستارىن نوكاۋتقا تۇسىرگەن.
ۆەرا قانات يسلاممەن وتكىزەتىن كەزدەسۋى تۋرالى ءوز ويىمەن دە ءبولىسىپ ۇلگەردى.
«شاماسى مەن WBA چەمپيونىنىڭ مىندەتتى قارسىلاسى بولۋى ءۇشىن قانات يسلاممەن كەزدەسۋ وتكىزەتىن سياقتىمىن. مەن بۇل ءۇشىن كوپ ەڭبەكتەندىم»، - دەپ جازدى ۆەرا Instagram پاراشاسىندا.
