قوستاناي وبلىسىنداعى اۋىلدا نان قابىلداۋ پۋنكتى اشىلدى

تيميريازيەۆ اۋىلىنىڭ جەر كولەمى - 24 مىڭ گەكتار. مۇنداعى 74 ءىرىلى-ۇساق شارۋا قوجالىعى مال ءوسىرۋ، جەم-ءشوپ دايىنداۋمەن تۇراقتى اينالىسادى. سولاردىڭ ءبىرى - «بايقوڭىرات» ج ش س تۇڭعىش پرەزيدەنت كۇنى قارساڭىندا 40 مىڭ توننا قۋاتتىلىققا يە زاماناۋي نان قابىلداۋ پۋنكتىن اشتى.

سەرىكتەستىك باسشىسى قاراتاي وتەمىسەۆتىڭ ايتۋىنشا، جاڭا نىساننىڭ قۇنى - 60 ميلليون تەڭگە.

«قامبامىز وتە كوپ مولشەردەگى استىقتى قابىلداۋ مەن ونى ساقتاۋ مۇمكىندىگىنە يە. سونىمەن قاتار، ونى ۇزاقمەرزىمدىك ساقتاۋدان كەيىن كونديتسيالىق جاعدايعا جەتكىزە الادى. شارۋاشىلىقتىڭ ون مىڭ گەكتار ەگىس القابى بار. ازىرگە 5 قويما تۇراقتى تۇردە جۇمىس ىستەيدى. پۋنكتكە استىق جەتكىزۋ ءۇشىن اۆتوكولىكتەرمەن قاتار، تەمىر جولى تاسىمالى دا پايدالانىلادى»، - دەيدى ول.

نان قابىلداۋ پۋنكتى ماڭىنا ەلەكتروندى تارازىسى بار ەكى قاباتتى ءۇي سالىندى. الداعى جىلى تەحنيكالاردى قويۋ ءۇشىن جابىق كەشەن سالۋ جوسپاردا بار.

مۇنىمەن قوسا «بايقوڭىرات» ج ش س اعاش وڭدەۋ جانە جيھاز سەحىن اشىپ، حالىققا قىزمەت كورسەتۋدە. سونداي-اق، سەرىكتەستىك ماي شىعاراتىن شاعىن زاۋىتتى دا باسقارادى. بۇل يتاليالىق ءوندىرىس نىسانى ءبىراز جىلدان بەرى ءوز يگىلىگىن كورسەتىپ كەلەدى. الدىڭعى جىلى قالپىنا كەلتىرىلىپ، قايتادان ىسكە قوسىلدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى