شىمكەنتتەگى «ەسكى قالاشىق» اۋماعىندا اشىق اسپان استىنداعى مۋزەي قۇرىلادى
قالاشىقتاعى قازبا جۇمىستارىن «ارحەولوگيالىق ساراپتاما» جاۋاپكەرشىلىگى شەكتەۋلى سەرىكتەستىگى جۇرگىزۋدە. قازىر مۇندا ارحەولوگيالىق قازبا جۇمىستارىنىڭ ءبىرىنشى كەزەڭى باستالعان. اۋماعى 1000 شارشى مەتر بولاتىن جەراستى قالاسىن ارشىعان ارحەولوگ-عالىمدار كوپتەگەن تاريحي جادىگەر تاپتى، دەپ حابارلايدى و ق و اكىمىنىڭ باسپا ءسوز قىزمەتى.
وسىنداعى جۇمىستاردى ارالاپ كورگەن ايماق باسشىسى ءبىرىنشى كەزەكتە اتالعان جۇمىستاردى توقتاتپاۋدى جانە تابىلعان جادىگەرلەردى سول قالپىندا ساقتاپ قالۋ ءۇشىن قازبا ايماعىن قورعاۋ، قورشاۋدى قالا اكىمىنە تاپسىردى.
سونداي-اق، اكىم انىقتالعان تاريحى نىسانداردى ەسەپكە الا وتىرىپ، قايتا قالپىنا كەلتىرۋ ءىسىن دە قاتار جۇرگىزۋدى ايتتى.
«مىناۋ كورىپ تۇرعاندارىڭىز - تسيتادەل. وسىنىڭ بارلىعىن قۇرتپاي، جوعالتپاي ساقتاۋىمىز قاجەت قوي. بۇل 19- عاسىردىڭ سوڭىنداعى سۋرەتتەر. بۇعان ەندى ءبىر جارىم عاسىر ءوتتى، الايدا ءبىزدىڭ قورعانىمىزدان تۇك قالماعان. ال جالپى تاريحتا ءبىر جارىم عاسىر دەگەن تۇك ەمەس، ونداعان عاسىرلارعا ساقتاۋ كەرەك. سوندىقتان تۇپتەن جويىلماي تۇرعاندا، دەر كەزىندە وسىنى قولعا الىپ، ءتيىستى جۇمىستاردى باستاپ جالعاستىرۋىمىز قاجەت»، - دەدى ايماق باسشىسى.
اۋماق تاريحي-مادەني ورىن بولعاندىقتان، بۇل ماڭعا 50 مەترگە دەيىن قۇرىلىس سالۋعا بولمايدى. سوندىقتان «ەسكى قالاشىقتاعى» جەكە نىسانداردىڭ جەرى الداعى ۋاقىتتا مەملەكەت مەنشىگىنە قايتارىلادى.
وسى رەتتە، وبلىس اكىمى اۋماقتا سالىنعان جەكە تۇرعىن ۇيلەر مەن ونداعى دۇكەندەردى باسقا جەرگە كوشىرۋ جۇمىستارىن تىڭعىلىقتى تۇردە جۇرگىزۋدى قالا باسشىلىعىنا مىندەتتەدى.
قازىر قالا اكىمدىگى تاراپىنان ەسكى قالا ورنىنىڭ اۋماعىندا ارحەولوگيالىق پارك-مۋزەيى، اشىق اسپان استىنداعى مۋزەي قۇرۋ ءۇشىن جوبالىق سمەتالىق قۇجاتتاماسىن دايىنداۋعا جانە ارحەولوگيالىق جۇمىستار جۇرگىزۋگە قالالىق بيۋجەتتەن 100 ميلليون تەڭگە ءبولىنىپ، ءتيىستى جۇمىستار اتقارىلۋدا.
