قازاقپارات سپورت سايتىن ىسكە قوستى - فوتو
سونداي- اق، ونلاين رەجيمدە سان الۋان سپورت وقيعالارى جاريالانادى، دەپ حابارلايدى قازاقپارات ءتىلشىسى.
«قازاقپارات» ح ا ا باس ديرەكتورى اسقار ۋماروۆتىڭ ايتۋىنشا، اتالعان جوباعا كومپانيا بيۋدجەتىنەن اقشا جۇمسالعان جوق. بارلىعى - سپورت سۇيەر دەمەۋشىلەردىڭ قولداۋىمەن ىسكە اسقان.
«بۇل يدەيانى ق ر اقپارات جانە سپورت ءمينيسترى داۋرەن اسكەربەك ۇلى بىردەن قولدادى. سەبەبى بۇگىندە سپورتتى ءبارى وقيدى، ءبارى كورەدى. جاڭا پورتال مەملەكەتتىك برەندپەن شىقسا دا، كومپانيا بيۋدجەتىنەن قارجى جۇمسالمادى. وعان قوسا، بۇل باستاما مەملەكەت باسشىسىنىڭ رۋحاني جاڭعىرۋعا قاتىستى ماقسات- مىندەتتەرىمەن دە ۇشتاسىپ وتىر. سپورتتى سۇيەتىن بيزنەسمەندەر sport.inform.kz-دى اشۋعا اتسالىسىپ جاتىر. ءبارى دەمەۋشىلەردىڭ قارجىسىنا جاسالدى. بۇنىڭ ءوزى بيزنەستىڭ الەۋمەتتىك جاۋاپكەرشىلىگىن، جاناشىر ازاماتتاردىڭ سپورت كونتەنتىن دامىتۋعا دەگەن قۇلشىنىسىن كورسەتسە كەرەك»، - دەيدى اسقار قۋانىش ۇلى سايتتىڭ تۇساۋكەسەرىندە.
كومپانيا باسشىسىنىڭ ايتۋىنشا، بۇگىندە وتاندىق سپورت ارقىلى قازاقستاندى كەڭىنەن تانىتۋعا بولادى.
«شىنى كەرەك، قازىر كەز كەلگەن ەلگە بارىپ، GGG تۋرالى سۇراساڭ، بىردەن قازاقستاندى ەسكە الادى. ەۋروپادا «استانا» ۆەلوكومانداسىن جاقسى بىلەدى. جالپى، قازاقستاندىق سپورت - بۇل ءبىزدىڭ تاعى ءبىر يميدجىمىز. ازىرشە، جاڭادان اشىلعان سپورت سايتى ورىس جانە قازاق تىلدەرىندە اقپارات تاراتادى. بولاشاقتا «قازاقپارات» سياقتى سايتتىڭ اعىلشىن جانە قىتاي نۇسقالارىن ىسكە قوسۋ جوسپارلانعان. ءبىز وتاندىق سپورتتى جان- جاقتى ناسيحاتتاۋدى كوزدەيمىز»، - دەپ اتاپ كورسەتتى اگەنتتىك باسشىسى.
جاڭا سپورت سايتىنىڭ باسقارۋشى ديرەكتورى - مارلەن بەيسەنبايەۆ، ال ايدىن قوجاحمەتوۆ شەف- رەداكتور قىزمەتىن اتقارادى.
«ءبىز اۋديتوريانىڭ سۇرانىسىن جان- جاقتى زەردەلەيمىز. وقىرمانداردىڭ اقىل- كەڭەستەرىن دە ەسكەرەمىز. ءيا، بۇگىندە سپورت جاڭالىقتارى سالاسىندا مىقتى سايتتار كوپ. ءبىز دە ولاردىڭ قاتارىنا قوسىلۋعا تىرىسامىز»، - دەيدى مارلەن بەيسەنبايەۆ.
اۆتور: ارمان اسقاروۆ
