باۋىرجان بايبەك شياڭگاڭنىڭ باسشىلىعىمەن كەزدەستى
الماتى اكىمى باۋىرجان بايبەك گونكونگقا جۇمىس ساپارى بارىسىندا ءوڭىردىڭ مەملەكەتتىك جانە ىسكەر ورتاسىمەن ءبىرقاتار ەكىجاقتى كەزدەسۋلەر وتكىزىپ، گونكونگ اكىمشىلىگىنىڭ باسشىسى كەرري لاممەن جۇزدەستى.
تاراپتار ينۆەستيتسيالىق جانە تۋريستىك سالالار بويىنشا ىنتىماقتاستىقتى نىعايتۋ ماسەلەلەرىن تالقىلادى، قالا قۇرىلىسى سالاسى مەن سمارت- تەحنولوگيانى ەنگىزۋ بويىنشا تاجىريبە الماستى.
كەزدەسۋ بارىسىندا كەرري لام الماتى ەكونوميكاسى گونكونگتاعىداي ءتۇرلى سەرۆيستەن، ساۋدادان، قارجى قىزمەتى مەن لوگيستيكادان قۇرالاتىندىعىن، سونىڭ ارقاسىندا تۇراقتىلىق قامتاماسىز ەتىلىپ، قالا ينۆەستيتسيا تارتۋ ءۇشىن تارتىمدى بولاتىندىعىن اتاپ ءوتتى.
«الماتى - ءوڭىردىڭ قارجى جانە مادەني ورتالىعى ءارى ءبىزدىڭ ەلىمىزدىڭ ماڭىزدى سەرىكتەسى بولىپ تابىلادى. پرەزيدەنتتەرىڭىز ن. نازاربايەۆتىڭ ينتەگراتسيالىق ساياساتى ارقاسىندا ايماقتا ەۋرازيالىق ەكونوميكالىق وداق قۇرىلدى. ونىڭ نارىعىنا 180 ميلليون ادام ەنگەن، بۇل ينۆەستورلارعا زور مۇمكىندىك بەرەدى. مەن الماتىنى ينۆەستيتسيا سالۋعا ابدەن لايىق قالا دەپ سانايمىن. كەزىندە ءبىزدىڭ باستى ينۆەستيتسيالىق ساياساتىمىز گونكونگكە ينۆەستيتسيا تارتۋ بولاتىن، ال قازىر ءبىز ينۆەستيتسيانى باسقا ەلدەرگە سالاتىن ءوز كومپانيالارىمىز بەن كاسىپورىندارىمىزدى ىنتالاندىرىپ كەلەمىز. ءبىز جاڭا نارىقتى ىزدەۋدەمىز جانە ينۆەستيتسيا سالۋ ءۇشىن ەسىگىمىزدى ايقارا اشامىز. ينۆەستيتسيادان وزگە ەكى جاققا دا پايدالى تۋريستىك اعىمدار بار. ەكونوميكالىق سۋبەكت بولعاندىقتان ءبىز قازاقستانمەن، سونىڭ ىشىندە الماتىمەن مادەنيەت، ءبىلىم، ساۋدا جانە ەكونوميكالىق سالالار بويىنشا ىنتىماقتاستىقتى نىعايتۋعا ىنتالىمىز. مەن ءوز تاراپىمنان ەكى جاقتى بايلانىستىڭ دامۋىنا ىقپال ەتەمىن»، - دەدى ك. لام.
الماتى اكىمى باۋىرجان بايبەك قالادا ينۆەستيتسيا مەن گونكونگتىك كومپانيالاردىڭ تاجىريبەسىن قاجەت ەتەتىن ءبىرقاتار ءىرى ينفراقۇرىلىمدىق جوبالاردىڭ قولعا الىنعانىن ايتتى.
«بۇگىنگى كۇنى قازاقستاندا الەمنىڭ دامىعان 30 ەلىنىڭ قاتارىنا ەنۋ ءۇشىن مەملەكەت باسشىسىنىڭ باستاماسىمەن «قازاقستان 2050» ستراتەگياسى باعدارلاماسى ويداعىداي جۇزەگە اسۋدا. ءبىزدىڭ پرەزيدەنتىمىز «سيفرلىق قازاقستان» باعدارلاماسىن ەنگىزۋدى الدىمىزعا مىندەت ەتىپ قويدى. قازىرگى كەزدە الماتىدا «Smart city» جوباسى ىسكە اسۋدا، ونىڭ باستى باعىتى - قاۋىپسىزدىك، دەنساۋلىق ساقتاۋ، ءبىلىم، ت ۇ ك ش جانە كولىك رەفورماسى. بىزگە گونكونگتىڭ وسى سالالاردا سمارت- تەحنولوگيانى پايدالانۋ تاجىريبەسى ماڭىزدى. بۇلاردان وزگە، الماتى ينۆەستيتسيا تارتۋ بويىنشا ۇلكەن جۇمىستار جۇرگىزۋدە.
ەگەر «Doing Business» رەيتينگىندە گونكونگ 4-ورىندا تۇرسا، الەمنىڭ 190 ەلىنىڭ ىشىنەن الماتى - 36-ورىندا. «ءبىر تەرەزە» قاعيداتى بويىنشا ءبىز الماتىعا كەلگەن ينۆەستورلارعا جوبالارىن جۇزەگە اسىرۋ ءۇشىن بارلىق كومەكتى كورسەتەمىز. ورتالىق ازيانىڭ 65 ميلليوندىق، ەۋرازيالىق ەكونوميكالىق وداقتىڭ 180 ميلليون ادامى بار نارىعى قىزىقتىراتىنى ءسوزسىز. ەگەر كاسىپورىن الماتىدا ورنالاسسا بۇلار قولجەتىمدى بولادى. مىسالى، وتكەن جىلى پرەزيدەنتىمىز تەلەكوپىر ارقىلى الماتىدا جاپونيانىڭ «Tokyo Rope» زاۋىتىن اشتى. ءبىر تاپسىرىستىڭ ءوزى عانا زاۋىتتى سالۋعا جۇمسالاتىن شىعىننان بەس ەسە ارتتى. قازىر بۇل كومپانيا ءوز ونىمدەرىن تەك ورتا ازياعا عانا ەمەس، سونىمەن قاتار ب ا ە، رەسەيگە جىبەرۋدە. بۇگىنگى كۇنى كومپانيا الماتىدا ءۇشىنشى زاۋىتىن سالۋدا. ءبىز گونكونگتىك ينۆەستورلارعا دا بارلىق جاعدايدى جاسايمىز»، - دەدى باۋىرجان بايبەك.
الماتى اكىمى باۋىرجان بايبەك جۇمىس ساپارى بارىسىندا گونكونگتىڭ ينۆەستيتسيا جانە تەحنولوگيا بويىنشا حاتشىسى نيكولاس يانگپەن، قىتاي وندىرۋشىلەرىنىڭ «The Chinese Manufacturers Association» قاۋىمداستىعىمەن كەزدەستى. بۇلاردان وزگە الماتى دەلەگاتسياسى عىلىمي جانە تەحنولوگيالىق پارك جونىندەگى گونكونگ كورپوراتسياسىنىڭ جۇمىسىمەن دە تانىستى. تاراپتار ستارتاپتاردى دامىتۋ جانە قولداۋ، قالالاردىڭ ەكونوميكالىق الەۋەتىن ارتتىرۋ مەن جوعارى تەحنولوگيا سالالارىندا جۇمىس ورىندارىن اشۋ ماسەلەلەرىن تالقىلادى.
الماتى دەلەگاتسياسى گونكونگتىڭ جوسپارلاۋ جانە ينفراقۇرىلىم جونىندەگى كورمە گالەرەياسىندا دا بولدى، مۇندا مەگاپوليستەر الدىندا تۇرعان مىندەتتەر، ولاردى شەشۋ جولدارى تۋرالى ايتىلدى.
«بۇگىنگى كۇنى گونكونگ تۇرعىندارى وتە تىعىز ورنالاسقان، ءبىر شارشى مەتر 6 مىڭعا جۋىق ادامدى قۇرايدى. قالانىڭ جاڭا اۋداندارىن جوسپارلاۋدا كولىكپەن قامتاماسىز ەتۋ ماڭىزدى. گونكونگتە 7,2 ميلليون ادام تۇرادى، 730 مىڭ اۆتوموبيل بار، جولداردىڭ ۇزىندىعى 2100 ك م. ياعني، ءبىر كيلومەتر جولدا 350 ماشينا جۇرەدى. سوندىقتان، گونكونگ تۇرعىندارىنىڭ 90 پايىزى قوعامدىق كولىكتى پايدالانادى. اۆتوموبيل - قىمبات، ونىڭ ۇستىنە باعاسى ساعاتىنا 30-40 گونكونگتىك دوللاردى قۇرايتىن كولىك تۇراعىن تابۋ قيىن. سوڭعى جىلدارى قالا ورتالىعىندا كولىك تۇراعى ازايىپ، ەكولوگيانى جاقسارتۋ شارالارى جۇزەگە اسۋدا»، - دەپ ءتۇسىندىردى گونكونگتى دامىتۋ جونىندەگى حاتشىنىڭ ورىنباسارى ليۋ چۋن سان.
جۇمىس ساپارىنىڭ قورىتىندىسى بويىنشا كەلەر جىلى الماتىدا گونكونگتىڭ ساۋداسىن دامىتۋ جونىندەگى كەڭەس وكىلدىگىن اشۋ تۋرالى كەلىسىمگە قول جەتتى. بۇلاردان وزگە، گونكونگ پەن الماتىدا ساۋدا، ينۆەستيتسيا، يننوۆاتسيا جانە شوب بويىنشا ىنتىماقتاستىقتى نىعايتۋ ءۇشىن «الماتى» الەۋمەتتىك كاسىپكەرلىك كورپوراتسياسى مەن گونكونگتىڭ ساۋدانى دامىتۋ كەڭەسى اراسىندا قاجەتتى مەموراندۋمعا قول قويىلدى.
