قازاقستاندا ساتىلاتىن توندار تاڭبالاۋ جۇيەسىنەن وتەدى
ق ر قارجى مينيسترلىگىنىڭ مەملەكەتتىك كىرىستەر كوميتەتى ءتوراعاسىنىڭ ورىنباسارى ارعىن قىپشاقوۆتىڭ ايتۋىنشا، جۇيە ىسكە قوسىلعاننان كەيىن تۇتىنۋشى ساتىپ الاتىن تاۋارى تۋرالى تولىق اقپاراتپەن قامتاماسىز ەتىلىپ، كونترافاكتىلىك ونىمنەن قورعالادى. كاسىپكەرلەرگە بيزنەس جۇرگىزۋ ءۇشىن باسەكەلەستىك جاعداي تەڭەستىرىلىپ، نارىقتى زاڭسىز ونىمدەردەن قورعاۋ جانە زياتكەرلىك مەنشىك قۇقىقتارىن ساقتاۋ جۇزەگە اسىرىلادى.
ايتا كەتەيىك، قالدىق تەرى بۇيىمدارى بار كاسىپكەرلەر بۇگىننەن باستاپ 90 كۇننىڭ ىشىندە تاۋارىن تاڭبالاۋلارى قاجەت. ال يمپورتتاۋشىلار تەرى بۇيىمدارىن ەركىن اينالىمعا شىعارعان كۇننەن باستاپ 30 كۇننىڭ ىشىندە تاڭبالاۋ جۇرگىزۋى ءتيىس. تاڭبالاۋدى جۇرگىزۋ ءۇشىن ەڭ الدىمەن شارتقا وتىرىپ، GS1 Kazakhstan قاۋىمداستىعىنان GTIN ءنومىرىن الۋلارى كەرەك. جالپى تاڭبالاۋدى «ISKER AKPARAT» ج ش س جۇرگىزەتىن بولادى.
تاڭبالاۋعا زاڭدى تۇلعالار مەن جەكە كاسىپكەرلەر وندىرگەن نەمەسە اكەلگەن قارا كۇزەن، سار قۇندىز، اق تۇلكى نە قىزىل تۇلكى، ءۇي قويانى نە قويان، جانات، قوي تەرىسىنەن جاسالعان كيىمدەر جاتادى. جەكە تۇلعالار وزدەرى كيۋ ءۇشىن اكەلگەن تەرى بۇيىمدارى باقىلاۋ، ياعني سايكەستەندىرۋ بەلگىلەرىمەن تاڭبالانبايدى.
