نۇرسۇلتان نازاربايەۆ تۋرالى ازەربايجان تىلىندەگى كىتاپتىڭ تۇساۋكەسەرى ءوتتى

كىتاپتىڭ تۇساۋىن كىتاپتىڭ اۆتورى ق ر پرەزيدەنتى كەڭسەسىنىڭ باستىعى، تۇڭعىش پرەزيدەنت - ەلباسى كىتاپحاناسى ديرەكتورىنىڭ مىندەتىن اتقارۋشى، پروفەسسور ماحمۇت قاسىمبەكوۆ پەن ازەربايجان رەسپۋبليكاسى پرەزيدەنتىنىڭ قوعامدىق-ساياسي ماسەلەلەر جونىندەگى كومەكشىسى ءالي گاسانوۆ كەستى. تۋىندى 2012-جىلى جارىق كورگەننەن باستاپ ورىس، اعىلشىن، ۆەنگر، اراب، نەمىس، سەرب جانە فرانسۋز تىلدەرىنە اۋدارىلعان.

«ءار ادام ومىرگە بەلگىلى ءبىر ميسسيامەن كەلەدى. كەيبىر ۇلى تۇلعالاردىڭ ءومىرى بۇكىل حالىقتىڭ تاريحي ءومىرىن تىڭ ارناعا بۇرىپ جاتادى. ءبىزدىڭ جولىمىز بولدى. ازەربايجان حالقىنىڭ باسشىلىعىنا قيىن-قىستاۋ كەزەڭدە جالپى ۇلتتىق كوشباسشى گەيدار اليەۆ كەلگەن بولاتىن. ال قازاق حالقى نۇرسۇلتان نازاربايەۆتاي باسشىسىمەن ماقتانا الادى»، - دەيدى ءالي گاسانوۆ.

ونىڭ ايتۋىنشا، نۇرسۇلتان نازاربايەۆ كەڭەستىك جۇيە قۇلاعان كەزدە ەل تاعدىرىنا جاۋاپتى بولىپ، حالىقتىڭ ارتقان ءۇمىتىن اقتاي بىلگەن.

«نۇرسۇلتان نازاربايەۆ قيىن تاپسىرمانى شەشە ءبىلدى. توقسانىنشى جىلدارى قازاقتاردى تيتۋلدى ۇلت رەتىندە كوتەردى. «نۇرلى كوش» باعدارلاماسى ارقىلى شەتتەگى قازاقتاردى تاريحي وتانىنا شاقىردى. قازاقستاندا مىڭداعان ۇلتى ازەربايجان ازاماتتار وزگەمەن تەرەزەسى تەڭ ءومىر ءسۇرىپ، ساياسي جانە قوعامدىق جۇمىستارعا بەلسەنە اتسالىسىپ كەلەدى. قازاقستان حالقى اسسامبلەياسى ينستيتۋتىن قۇرعان نۇرسۇلتان ءابىش ۇلىنىڭ ەڭبەگىن ەرەكشە اتاپ ءوتۋ كەرەك. ول ينستيتۋتتىڭ ۇلتتاردىڭ ينتەگراتسياسى تۇرعىسىندا ماڭىزى زور»، - دەيدى.

كىتاپ نۇرسۇلتان نازاربايەۆتىڭ ءومىرى مەن قىزمەتىن رەسمي تاريحي-ءومىرباياندىق تۇرعىدان زەرتتەۋدەگى العاشقى تاجىريبەنى ۇسىنادى. وندا قاراپايىم اۋىل بالاسىنان ۇلت كوشباسشىسىنا دەيىنگى جولى ەگجەي-تەگجەيلى قاراستىرىلعان.

ХХ-ХХІ  عاسىرلار توعىسىنداعى قازاقستاننىڭ دامۋىن درامالىق جانە ەلەۋلى وقيعالار، ۇدەرىستەر، تاريحي وتكەنگە شولۋمەن باياندايتىن ەلباسىنىڭ ساياسي ومىرىنە ەرەكشە دەن قويىلعان. كەڭەيتىلگەن اۋقىمدى مۇراعاتتىق ماتەريالدار نەگىزىندە دايىندالعان ەلباسى ءومىربايانى قازاقستاننىڭ جاڭا تاريحى بويىنشا ماڭىزدى قۇجاتتىق دەرەككوز بولىپ تابىلادى.

وندا ماعىنالى فوتوسۋرەتتەر، ماتەريالدارىمەن قاتار، العاش رەت تاريحي تۇرعىدا سيپاتتالعان وقيعالارعا كوز جۇگىرتۋگە مۇمكىندىك بەرەتىن جەكە قۇجاتتاردىڭ تۋرا كوشىرمەسى ۇسىنىلعان.

كىتاپتى ورىس تىلىنەن ازەربايجان تىلىنە ازەربايجان جوعارعى مەديا سىيلىعىنىڭ جانە يسمايل گاسپرين اتىنداعى حالىقارالىق تۇركى اكادەمياسىنىڭ مەديا سىيلىعىنىڭ لاۋرەاتى، جۋرناليست-پۋبليتسيست ايدا ەيۆازوۆا اۋدارعان.

«وتكەن جىلى حالىقارالىق تۇركى اكادەمياسىنىڭ پرەزيدەنتى دارحان قىدىرالى مىرزادان نۇرسۇلتان نازاربايەۆ تۋرالى كىتاپتى ازەربايجان تىلىنە اۋدارۋ تۋرالى ۇسىنىستى قابىل الدىم. مەن تۇركى الەمى ءۇشىن ايگىلى تۇلعا تۋرالى كىتاپتى اۋدارۋ باقىتىنا يە بولىپ وتىرعانىما وتە قۋانىشتىمىن. نۇرسۇلتان ءابىش ۇلى - الەم ادامى. كىتاپتى اۋدارىپ وتىرىپ، وسىناۋ ۇلى تۇلعادان ساباق العانداي اسەردە بولدىم»، - دەيدى ايدا ەيۆاحوۆا.

اۆتور: ايان بەكەن ۇلى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى