نۇرسۇلتان نازاربايەۆتىڭ تۇركياعا ساپارى جوسپارلانعان

بۇل تۋرالى بۇگىن تۇركيانىڭ ۇلى ۇلتتىق جينالىسى ءتوراعاسىنىڭ ورىنباسارى احمەت ايدىن ايتتى، دەپ حابارلايدى قازاقپارات ءتىلشىسى.

«قازاقستان مەن تۇركيا اراسىنداعى بايلانىستار تەرەڭ مادەني ءارى باۋىرلاستىق قارىم-قاتىناسقا نەگىزدەلگەن. ءبىز ستراتەگيالىق ارىپتەستىككە جەتتىك. سوعان شىن جۇرەكتەن قۋانامىز ءارى ماقتانامىز. ەكى ەلدىڭ پرەزيدەنتتەرى ءجيى ارالاسىپ تۇرادى. وسىنىڭ ءوزى تىعىز ىنتىماقتاستىقتى كورسەتسە كەرەك. بيىل تۇركيا پرەزيدەنتى قازاقستانعا كەلىپ كەتتى. جاڭا سالالاردا ارىپتەستىكتى ورناتۋعا مۇددەلى ەكەنىن جەتكىزدى. كەلەسى جىلى كوكتەمدە نازاربايەۆ مىرزانىڭ بىزگە ارنايى ساپارمەن كەلۋى دە ەكىجاقتى بايلانىستاردى كۇشەيتە تۇسەتىنىنە سەنىم مول»، - دەدى احمەت ايدىن.

ايتا كەتەيىك، بۇگىن ەلوردادا «جاڭا جاھاندىق بولمىستاعى قازاقستاننىڭ جاڭعىرۋ مودەلى» تاقىرىبىندا حالىقارالىق پارلامەنتتىك كونفەرەنسيا باستالدى. اتالعان شارا ق ر تۇڭعىش پرەزيدەنتى كۇنىنە ارنالىپ وتىر. ماجىلىسكە رەسەي، ازەربايجان، تۇركيا، وزبەكستان، ارمەنيا، يتاليا، يسپانيا، قىتاي، بىرىككەن اراب امىرلىكتەرى، بولگاريا، ماجارستان جانە تاعى باسقا، بارلىعى ون بەس ەلدىڭ دەلەگاتتارى قاتىسۋدا. بۇدان بولەك، ا ق ش- تىڭ ساراپشىلارى دا كەلدى.

كونفەرەنسيا باسىندا ءسوز سويلەگەن ق ر پارلامەنتى ءماجىلىسىنىڭ ءتوراعاسى نۇرلان نىعماتۋلين «نازاربايەۆ مودەلىنىڭ» قۇپياسى جونىندە ايتقان بولاتىن.

اۆتور: ارمان اسقاروۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى