نىعماتۋلين «نازاربايەۆ مودەلىنىڭ» قۇپياسىن اشتى

شاراعا قاتىسقان ق ر پارلامەنتى ءماجىلىسىنىڭ ءتوراعاسى نۇرلان نىعماتۋلين «نازاربايەۆ مودەلىنىڭ» نەگىزگى ەرەكشەلىكتەرىن ايتىپ بەردى، دەپ حابارلايدى قازاقپارات ءتىلشىسى.

«بىرىنشىدەن، قازاقستانداعى بارلىق رەفورمالاردىڭ اۆتورى ءبىر، ول - تۇڭعىش پرەزيدەنتىمىز نۇرسۇلتان نازاربايەۆ. سونىڭ ارقاسىندا بارلىق باستامالاردى جۇيەلى تۇردە ىسكە اسىرۋعا مۇمكىندىك بار. مەملەكەت باسشىسى ەلىمىزدەگى كۇردەلى رەفورمالاردىڭ باستى يدەولوگى بولىپ سانالادى. پرەزيدەنتتىڭ جىل سايىنعى جولداۋلارى ەل ەكونوميكاسىن رەفورمالاۋعا، قوعامنىڭ رۋحاني جاڭعىرۋىنا، ۇلتارالىق جانە كونفەسسياارالىق كەلىسىم مودەلىن قالىپتاستىرۋعا، جالپى ەلدىڭ جاڭارۋىنا جول اشتى. نەگىزى، جاڭعىرۋدىڭ قازاقستاندىق مودەلىن «نازاربايەۆ مودەلى» دەپ اتاعان دۇرىس بولار ەدى. 25  جىلدا بولعان رەفورمالاردىڭ ناتيجەسى مەن ودان جيناقتاعان تاجىريبەمىز سونىڭ ايقىن دالەلى بولسا كەرەك»، - دەيدى نۇرلان نىعماتۋلين.

ءماجىلىس ءتوراعاسىنىڭ پايىمىنشا، جاڭعىرۋ شارالارىن ۇزدىكسىز جۇرگىزۋ «نازاربايەۆ مودەلىنىڭ» تاعى ءبىر ەرەكشەلىگى بولىپ سانالادى. وسى ۋاقىتقا دەيىن بارلىق شارالار جۇيەلى تۇردە بىرىنەن سوڭ ءبىرى قولعا الىنىپ كەلەدى. ال «الدىمەن - ەكونوميكا، ودان كەيىن - ساياسات» دەگەن ۇستانىم ك س ر و- نىڭ تارالۋىنان كەيىنگى قيىنشىلىقتان سۇرىنبەي وتۋگە كومەكتەستى.

«سونىڭ ارقاسىندا 1997-جىلى «قازاقستان- 2030» ستراتەگياسىن ىسكە اسىرۋعا كىرىستىك. اتالعان قۇجاتتىڭ ماقسات- مىندەتتەرىن الدىن الا ورىنداپ، «قازاقستان- 2050»  ستراتەگياسىنا بەت الدىق. ەندى، قازاقستاننىڭ ءۇشىنشى جاڭعىرۋىنا ارنالعان ۇلكەن باستامانى قولعا الىپ وتىرمىز. وسىلايشا، پرەزيدەنتىمىز ءبىر ماقساتقا جەتكەننەن كەيىن ءوزىن دە، حالقىن دا كەلەسى مىندەتتەرگە جۇمىلدىرىپ وتىرادى»، - دەپ اتاپ كورسەتتى نۇرلان زايروللا ۇلى.

ونىڭ ايتۋىنشا، قازاقستاندى سيفرلاندىرۋ مەن رۋحاني جاڭعىرۋ حالىقتى ءالى دە ۇلكەن جەتىستىكتەرگە جەتەلەيدى. ال كونستيتۋتسياعا ەنگىزىلگەن وزگەرىستەر سونىڭ بارلىعىن ىسكە اسىرۋعا ءوز سەپتىگىن تيگىزەدى.

ايتا كەتەيىك، «جاڭا جاھاندىق بولمىستاعى قازاقستاننىڭ جاڭعىرۋ مودەلى» تاقىرىبىنداعى حالىقارالىق پارلامەنتتىك كونفەرەنتسيا قر تۇڭعىش پرەزيدەنتى كۇنىنە ارنالىپ وتىر. ماجىلىسكە رەسەي، ازەربايجان، تۇركيا، وزبەكستان، ارمەنيا، يتاليا، يسپانيا، قىتاي، بىرىككەن اراب امىرلىكتەرى، بولگاريا، ماجارستان جانە تاعى باسقا، بارلىعى 15 ەلدىڭ دەلەگاتتارى قاتىسۋدا. بۇدان بولەك، ا ق ش- تىڭ ساراپشىلارى دا كەلدى.

اۆتور: ارمان اسقاروۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى