استانادا جاستاردىڭ الەۋمەتتىك- دەموگرافيالىق كەلبەتى كورسەتىلەدى
بايانداما «جاستار» عىلىمي- زەرتتەۋ ورتالىعىندا مەملەكەتتىك جاستار ساياساتى مەكتەبىنىڭ ناتيجەسى بويىنشا قورىتىندى ديالوگ اياسىندا ۇسىنىلادى.
ءىس-شاراعا پارلامەنت دەپۋتاتتارى، مەملەكەتتىك ۇيىمداردىڭ، ەلشىلىكتەردىڭ، ءبىلىم جانە عىلىم مينيسترلىگى، ءدىن ىستەرى جانە ازاماتتىق قوعام مينيسترلىگى وكىلدەرى، «نۇر وتان» پارتياسىنىڭ «جاس وتان» جاستار قاناتى، رەسپۋبليكالىق جاستار ۇيىمدارى، مەملەكەتتىك جاستار ساياساتى سالاسىنداعى ساراپشىلارى، استانا قالاسى بويىنشا جاستار ساياساتى ماسەلەسى جونىندەگى باسقارما باسشىسى مەن ماماندارى، سونداي-اق جاستار رەسۋرستىق ورتالىقتارى مەن جاستاردىڭ ءوزىن- ءوزى باسقارۋ مەكەمەلەرى قاتىسادى.
ۇلتتىق بايانداما قازاقستان رەسپۋبليكاسىنداعى مەملەكەتتىك جاستار ساياساتىنىڭ كۇيى جانە جاستاردىڭ جاعدايىن تالداۋعا ارنالعان. باياندامادا الەۋمەتتانۋلىق زەرتتەۋلەر، مەملەكەتتىك ۇيىمداردىڭ رەسمي ستاتيستيكالىق جانە وزگە مالىمەتتەرى نەگىزىندە قازاقستاندىق جاستاردىڭ الەۋمەتتىك- دەموگرافيالىق بەينەسى كورسەتىلگەن؛ ءبىلىم جانە عىلىم، جۇمىسسىزدىق پەن كاسىپكەرلىك، قۇقىق، دەنساۋلىق، بوس ۋاقىت جانە قوعامدىق- ساياسي بەلسەندىلىگى سالالارىندا جاستاردىڭ جاعدايىنا تەرەڭدەتىلگەن تالداۋ جاسالعان.
«مەملەكەتتىك جاستار ساياساتى تۋرالى» قازاقستان رەسپۋبليكاسى زاڭىنا سايكەس، «قازاقستان جاستارى» ۇلتتىق بايانداماسى - مەملەكەتتىك جاستار ساياساتىن جۇزەگە اسىرۋدى تالداۋعا جانە ونىڭ دامۋىنا ارنالعان ۇسىنىستارىن قامتيتىن جىلدىق ەسەپ.
مەملەكەتتىك جاستار ساياساتى مەكتەبىنىڭ جۇمىسى جاستارمەن جۇمىس جاسايتىن مامانداردىڭ بىلىكتىلىگىن دامىتۋعا جانە ولاردىڭ «قازاقستان 2020: بولاشاققا جول» اتتى 2020 -جىلعا دەيىنگى مەملەكەتتىك جاستار ساياساتى كونتسەپتسياسىن جۇزەگە اسىرۋ بويىنشا ءىس-شارالار جوسپارى شەڭبەرىندە مەملەكەتتىك جاستار ساياساتىن ءتيىمدى جۇزەگە اسىرۋعا ارنالعان كاسىپتىك قۇزىرەتتىلىگىن قالىپتاستىرۋعا باعىتتالعان.
