قىزدار ۋنيۆەرسيتەتىندە جاڭا عىلىمي ەڭبەكتەر جارىق كوردى
كىتاپ اۆتورى - ساياسي عىلىمدارىنىڭ دوكتورى بيبىگۇل يمانبەكوۆا. اتالعان كىتاپتار اۆتوردىڭ كوپجىلدىق عىلىمي جانە وقۋ- ادىستەمەلىك تاجىريبەسىنىڭ ناتيجەسى. «ساياسات تانۋ» اتتى وقۋ قۇرالىندا ساياساتتانۋدىڭ نەگىزگى ۇعىمدارى، پاراديگمالارى مەن تەوريالىق قاعيدالارى جانە ادىستەرى بەرىلگەن.
اۆتور ستۋدەنتتەرگە قاجەتتى دەگەن مالىمەتتەردى تولىعىنان قامتۋعا تىرىسا وتىرىپ، ساياسي ۇعىمدار مەن تۇسىنىكتەر ديداكتيكالىق- كوركەمدەلگەن ماتەريالدار تۇرىندە بەرىلگەن. سونىمەن قاتار، ساياساتتانۋ ءپانىنىڭ وزەكتى ماسەلەلەرى اسىرەسە، ساياسي ليدەرلىك جانە ساياسي ەليتا، ساياسي شيەلەنىس، ساياسي پروتسەستەر، سايلاۋ جۇيەسى، ساياسي ينستيتۋتتار سياقتى ۇعىمدار ىقشامدالىپ، ناقتى ماعىناسىندا جازىلعان.
«بۇل وقۋ قۇرالىنىڭ وسى تاراپتا جازىلعان وزگە ەڭبەكتەردەن ەرەكشەلىگى ماتەريالدار ديداكتيكالىق تۇردە بەرىلگەن. بۇل ءوز كەزەگىندە ستۋدەنتتەردىڭ تاقىرىپتاردى ەسكە ساقتاۋىن جانە ساباققا دايىندالۋىن جەڭىلدەتەدى. وقۋلىقتاعى ءبىرقاتار ەرەكشەلىكتەر بىلىمگەرلەرگە ساياساتتانۋدىڭ قۇندىلىقتار جۇيەسىن جانە ونىڭ كاتەگوريالىق اپپاراتىن يگەرۋگە كوپ مۇمكىندىك بەرەرى ءسوزسىز. وقىلۋى وڭاي، ءتىلى جەڭىل. سوندىقتان دا كىتاپ جوعارى وقۋ ورىندارىنىڭ ستۋدەنتتەرىنە عانا ەمەس، ساياساتتانۋ تۋرالى جالپى تۇسىنىگىن دامىتقىسى كەلەتىن كوپشىلىك وقىرمان قاۋىمعا دا ارنالادى»، - دەيدى بيبىگۇل يمانبەكوۆا.
ال، اۆتوردىڭ «قايشىلىقتى كەزەڭ قايراتكەرى» اتتى مونوگرافياسىندا قازاقستانداعى 1930-1937 -جىلدارداعى ساياسي- الەۋمەتتىك- ەكونوميكالىق پروتسەستەردىڭ دامۋى مەن قالىپتاسۋى قاراستىرىلعان. وسى ۋاقىت مەرزىمىندە قىزمەت اتقارعان مەملەكەت جانە قوعام قايراتكەرى نىعمەت سىرعابەكوۆتىڭ ساياسي قىزمەتى مەن كوزقاراسى مۇراعاتتىق قۇجاتتار نەگىزىندە دايەكتەلىپ، سول كەزەڭدە ورىن العان جاعدايلاردىڭ ۇلت كوشباسشىلارى قىزمەتىمەن تىعىز بايلانىستىلىعى كورسەتىلگەن.
«قازاقستان تاۋەلسىزدىك العانعا دەيىن قانشاما قيلى- قيلى زاماندى وتكەردى. ءتول تاريحىمىزدىڭ قويناۋىندا جۇتىلىپ كەتكەن جىلداردى ۇنەمى ەسكە الىپ، «اقتاڭداقتاردى» جارىققا شىعارۋ ارقىلى ەلدەگى ساياسي تۇراقتىلىقتىڭ ءقادىرىن ءتۇسىندىرۋ باستى ماقسات، بۇگىندە. وتكەن عاسىردىڭ 30-جىلدارى «حالىق جاۋى» رەتىندە جازىقسىز اتىلىپ، ستاليندىك رەپرەسسيانىڭ قۇرباندارى ەگەمەندىك العاننان كەيىن اقتالدى. قايمانا قازاعىمەن قايتا قاۋىشتى. بۇل ۋاقىت كوشىمەن بىرگە اقيقاتتىڭ دا استارى اقتارىلىپ، شىندىقتىڭ بەتى اشىلۋى كەرەك»، - دەپ اتاپ ءوتتى كىتاپ اۆتورى.
