جىرشى-تەرمەشىلەر اراسىندا تالابى قاتاڭ بايقاۋ ءوتتى

«جەتى قايقى، بەس جۇيرىك» وڭىرلىك مادەني ءتولتۋما برەندىن ناسيحاتتاۋ ماقساتىندا ۇيىمداستىرىلعان جىر سايىسىنا بارلىعى ون ۇمىتكەر قاتىسىپ، باق سىنادى.

ولار ءبىرىنشى تۋردا ءومىر قارا ۇلىنىڭ «باتا ءسوز»، ۇزاقباي قازجان ۇلىنىڭ «جانىڭ قوناق دەنەڭە»، «جولداس بولماس بۇل ءفاني»، ەكىنشىسىندە ءابىل تىلەۋ ۇلىنىڭ «تويباستار»، وگىزباي مالگەلدى ۇلىنىڭ «تۇلپاردان تۇلپار تۋا الماس»، نۇرىم شىرشىق ۇلىنىڭ «بۇل دۇنيەنىڭ مىسالى»، اقتان كەرەي ۇلىنىڭ «بولجاۋ ءسوز» تەرمەسىن، ال سوڭعى تۋردا ۇزاقباي قازجان ۇلىنىڭ «بۇرىنعى پايعامبار، شايحىلار تۋرالى» داستانىن مىندەتتى تۇردە ورىنداۋعا ءتيىستى بولدى.

تالابى وسىلايشا قيىن بولعاندىقتان شىعار،  قىزىلوردا، استانا قالالارىنان، ماڭعىستاۋ وبلىسىنان ءبىراز جىرشى ءوتىنىش بىلدىرگەنىمەن، كەلمەي قالدى.

ماڭعىستاۋلىق بەلگىلى جىرشى- تەرمەشى، پروفەسسور اماندىق كومەكوۆ باستاعان قازىلار القاسىنىڭ شەشىمىمەن جاڭاوزەندىك ارعىن بيسەنوۆ باس جۇلدەنى (700 مىڭ تەڭگە) جەڭىپ الدى. ع. قۇرمانعاليەۆ اتىنداعى باتىس قازاقستان وبلىستىق فيلارمونياسى «ورال سازى» فولكلورلىق ءانسامبلىنىڭ ءسوليسى فارحات ورازوۆ پەن جەتىبايلىق بەردىباي تويعۇليەۆ ءبىرىنشى (500 مىڭ تەڭگەدەن)، تاعى ءبىر جەتىبايلىق امانبەك ساۋىربايەۆ ەكىنشى (300 مىڭ تەڭگە)، اتىراۋلىق امانجول داۋىلبايەۆ ءۇشىنشى (200 مىڭ تەڭگە) ورىنعا يە بولدى.

ايتا كەتەيىك، فارحات ورازوۆ وتكەن جىلى بىرنەشە حالىقارالىق، رەسپۋبليكالىق بايقاۋلاردا توپ جارىپ، جەڭىمپاز-جۇلدەگەر اتانعان بولاتىن. سونداي-اق بيىل قاراعاندى قالاسىندا وتكەن قازىبەك ءبيدىڭ 350 جىلدىعىنا ارنالعان «وردالى ءسوزدىڭ يەسى - قازىبەك ءبي» اتتى جىرشىلار مەن تەرمەشىلەردىڭ رەسپۋبليكالىق بايقاۋىندا ءبىرىنشى ورىنعا يە بولعان ەدى.

اۆتور: ەلجان ەرالى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى