كۇشتىك قۇرىلىمدار اراسىنداعى رۋحاني جاڭعىرۋ بايقاۋى قورىتىندىلاندى
داستۇرگە اينالعان اتالمىش شارا بيىل ءۇشىنشى رەت وتكىزىلۋدە، دەپ حابارلادى ق ر باس پروكۋراتۋراسىنىڭ باسپا ءسوز قىزمەتى.
بايقاۋدىڭ نەگىزگى ماقساتى - ەلباسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىن ناسيحاتتاۋ مەن پاتريوتتىق رۋحتى كۇشەيتۋگە قادام جاساۋ. قازاقستان رەسپۋبليكاسى باس پروكۋراتۋراسىنىڭ باستاماسىمەن جانە پرەزيدەنت اكىمشىلىگىنىڭ، مادەنيەت جانە سپورت مينيسترلىگىنىڭ تىلدەردى دامىتۋ كوميتەتىنىڭ قولداۋىمەن وتكىزىلىپ جاتقان شارانى ق ر مەملەكەتتىك حاتشىسى ءابدىقالىقوۆا گۇلشارا ناۋشا قىزى اشتى.
ول رەسپۋبليكالىق دەڭگەيدە وتكىزىلىپ وتىرعان شارانىڭ ماڭىزدىلىعىنا توقتالا كەلە بارلىق كوماندالارعا ساتتىلىك تىلەدى. شارا قوناقتارىنىڭ قاتارىندا ق ر پرەزيدەنت اكىمشىلىگىنىڭ وكىلدەرى، كونستيتۋتسيالىق كەڭەس مۇشەلەرى، پارلامەنت دەپۋتاتتارى، سونداي-اق قۇقىق قورعاۋ مەن مەملەكەتتىك ورگانداردىڭ وكىلدەرى بولدى. بايقاۋعا - باس پروكۋراتۋرا، ۇلتتىق قاۋىپسىزدىك كوميتەتى، ىشكى ىستەر مينيسترلىگى، قورعانىس مينيسترلىگى، مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى، مەملەكەتتىك كۇزەت قىزمەتى وكىلدەرىنەن قۇرىلعان 6 كوماندا قاتىستى.
كوماندالار 2 اينالىم بويىنشا سايىسقا ءتۇسىپ، باق سىناستى. ءبىرىنشىسى - مەملەكەتتىك ورگاننىڭ قىزمەتى جانە رۋحاني جاڭعىرۋ اياسىنداعى اتقارىلىپ جاتقان ناقتى ىستەرگە نەگىزدەلگەن تانىستىرۋ مەن بەينەبايان سىندى ەكى بولىمنەن تۇرسا، ال ەكىنشىسى - «رۋحاني جاڭعىرۋ - پاتريوتيزم نەگىزى» ساحنالاندىرىلعان كورىنىستەن تۇردى.
سايىستى تاماشالاۋعا كەلگەن قاۋىم كوماندالاردىڭ شىعارماشىلىعىنا ابدەن قانىق بولدى. ءاربىر ۆەدومستۆونىڭ وكىلدەرى مەملەكەتتىك ءتىلدى جەتىك بىلەتىنىن، ونى كاسىبي قىزمەتتە قولدانۋ داعدىلارىن ءارى شەبەرلىكتەرىن ءوزارا سىنعا سالدى. بايقاۋدىڭ قورىتىندىسى بويىنشا باس جۇلدەنى - مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى، ءبىرىنشى ورىندى - قورعانىس مينيسترلىگى، ەكىنشى ورىندى - باس پروكۋراتۋرا جانە مەملەكەتتىك كۇزەت قىزمەتى، ءۇشىنشى ورىندى - ىشكى ىستەر مينيسترلىگى جانە ۇلتتىق قاۋىپسىزدىك كوميتەتى كوماندالارى يەلەندى.
بايقاۋ قورىتىندىسى بويىنشا جەڭىمپازدار باعالى سىيلىقتارمەن ماراپاتتالدى. بايقاۋدىڭ جەكەلەگەن اينالىمدارىندا ەرەكشە كوزگە تۇسكەن قاتىسۋشىلار ءتۇرلى نوميناتسيالار بويىنشا العىس حاتپەن ىنتالاندىرىلدى.
