نۇرلان ونەربايەۆ كوگىلدىر ەكراننان كورىنبەي كەتۋىنىڭ سەبەبىن ءتۇسىندىردى
تىڭدارمانىن ساعىندىرعان ءانشى ايماق- ايماقتى ارالاپ ءجيى كونسەرت بەرىپ جۇرگەنىن، الايدا وتاندىق شوۋ- باعدارلامالارعا قىزىقپايتىنىن ايتتى.
نۇرلان ونەربايەۆ Zhuldyz.tv ارناسىنىڭ ءجۋرناليسى مارال ساتقانعاليەۆانىڭ اۆتورلىق باعدارلاماسىندا شىعارماشىلىقتاعى جاڭالىقتارىمەن ءبولىستى، دەپ حابارلايدى Stan.kz.
«ونەردە جۇرگەن 40 جىلدىڭ ىشىندە قالىپتاسقان كوزقاراسىم بار. سول كونسەرتتەگى انشىلەر، ونەرپازدار سول كەشكە ساي ما، ساي ەمەس پە؟ مەنىمەن بىرگە ساحناعا كىمدەر شىعادى؟ ولار كىم، ونەردە قانداي ورنى بار؟ وسى سۇراقتار مەنىڭ الدىمدا كەسە- كولدەنەڭ تۇرا قالادى. كوڭىلىمە قونباي جاتسا، قاتىسا المايتىنىمدى ايتامىن. ال نەگىزىندە مەنىڭ جەكە كونتسەرتتەرىم تەك الماتى، استانادا ەمەس، وڭىرلەردە ءجيى بولىپ تۇرادى. كەيدە ۋاقىتىم سايكەس كەلمەي قالادى. قاتىسا بەرمەۋىمنىڭ ءبىر سەبەبى سول»، - دەيدى نۇرلان ءالتاي ۇلى.
ءانشىنىڭ ايتۋىنشا، ول ءتۇرلى جوبالار مەن شوۋلارعا ءجيى شاقىرتۋ الادى. الايدا ونداي شوۋلار مەنىڭ ىشكى جان دۇنيەممەن ۇشتاسپايدى، دەيدى ونەربايەۆتىڭ ءوزى.
«وكپەم جوق، بارلىق تەلەارنا جاڭا باعدارلامالارعا شاقىردى. جۇرگىزۋشى رەتىندە دە، تورەشى، ساراپشى، قوناق رەتىندە قاتىسۋعا تالاي ۇسىنىس ءتۇستى. اركىمنىڭ ءوز تۇسىنىگىنە، كوزقاراسىنا جاۋاپ بەرەتىن حابارلاردا پىكىر ايتىپ وتىرۋعا بولادى. ءبىراق بۇگىنگى شوۋ- باعدارلامالاردان مەن ءوز ورنىمدى تابا المادىم»، - دەيدى نۇرلان ونەربايەۆ.
ايتا كەتەيىك، بۇگىن الماتىداعى رەسپۋبليكا سارايىندا نۇرلان ونەربايەۆتىڭ جەكە كونسەرتى وتەدى. تەك جاندى داۋىستا وتەتىن رۋحاني كەشتى بىرنەشە مۋزىكالىق انسامبل سۇيەمەلدەيدى.
