قۋاندىق شاماحاي: قوعامنىڭ بارلىق سالاسىنا الاش يدەياسىن بارىنشا ءسىڭىرۋ كەرەك
«الاش مۇرالارى قازىرگى تاڭدا مۇلدە زەرتتەلمەي جاتقان جوق. زەرتتەۋ بار. بۇل جەردە الاش تۋرالى كوپتەگەن ەڭبەكتەر جارىققا شىعىپ، ءىرى كونفەرەنتسيالار وتكىزىلىپ جاتقانىمەن عىلىم ءبىر جاقتا، شىنايى ءومىر ءبىر جاقتا جاتىر. ءبىر- بىرىمەن قابىسپاي تۇر. ويتكەنى، الاش كوسەمدەرىنىڭ ايتقان دۇنيەلەرى، وسيەتتەرى مەن مۇرالارى وتە ومىرشەڭ. بۇگىنگى زاماندا دا ولاردىڭ ەڭبەكتەرى ءوزىنىڭ ماڭىزىن جويمايدى. وكىنىشكە قاراي، سول تولاعاي ەڭبەكتى شىنايى ومىردە قولدانۋ ماسەلەسى اقساپ تۇر. ويتكەنى عالىمدار ءوز ورتاسىندا ايتادى، جازادى، ءبىراق سونىمەن ماسەلە جىلى جابىلىپ جاتقان جاعداي بار»، - دەيدى قۋاندىق شاماحاي.
ونىڭ ايتۋىنشا، الاش يدەياسىن عىلىمي اينالىمنىڭ اياسىندا عانا ەمەس، ومىرگە ءسىڭىرۋ، ياعني جاستارعا الاش زيالىلارىنىڭ ۇلتتىق- دەموكراتيالىق باعىتتاعى قۇندىلىقتارىن جاستاردىڭ بويىنا ءسىڭىرۋ ماسەلەسى ءالى دە بولسا جەتپەي جاتىر.
«الاش كوسەمدەرىنىڭ بارلىعى دا باتىستىڭ دەموكراتياسى دامىعان، وركەنيەتتى، وزىق قۇندىلىقتارىن قازاقتىڭ توپىراعىنا ءسىڭىرۋدى كوزدەدى. جالپى، مەملەكەتتىك دەڭگەيدەگى ساياساتتا دا، جۋرناليستيكا سالاسى بولا ما - قوعامداعى عىلىمنىڭ قاي سالاسىندا بولسىن، الاش كوسەمدەرىنىڭ قاعيدالارىن نەگىزگە الار بولساق، وندا ءبىزدىڭ دامۋىمىز، رەفورما جاساۋىمىز، جاڭارۋىمىز، رۋحاني نەمەسە ساياسي جاعىنان بولسىن بارلىعى باسقاشا بولار ەدى. وكىنىشكە قاراي، ءالى كۇنگە دەيىن كەڭەستىك ينەرتسيادان شىعا الماي وتىرمىز. ءالى دە بولسا، الاش كوسەمدەرىنە كۇدىكپەن قاراۋشىلار بار»، - دەيدى ول.
اۆتور: ايان بەكەن ۇلى
