باس پروكۋروردىڭ كەڭەسشىسى جۋرناليستىڭ ساۋالىنا ورىس تىلىندە جاۋاپ بەرۋدەن باس تارتتى
بۇگىن ورتالىق كوممۋنيكاتسيالار قىزمەتىندە «رۋحاني جاڭعىرۋ - پاتريوتيزم نەگىزى» ۆەدومستۆوارالىق بايقاۋى تۋرالى بريفينگ ءوتتى. شارا بارىسىندا ق ر باس پروكۋرورىنىڭ كەڭەسشىسى - اعا كومەكشى نۇرگۇل قاراعويشينا جۋرناليستەردىڭ ساۋالىنا ورىس تىلىندە جاۋاپ بەرۋدەن باس تارتتى، دەپ حابارلايدى Sputnik.
90 پايىز تازا قازاق تىلىندە وتكەن بريفينگتە ورىس ءتىلدى جۋرناليستەردىڭ ءبىرى بايقاۋ تۋرالى ورىسشا ساۋال قويىپ، رەسمي تىلدە جاۋاپ بەرۋدى سۇراعان ەدى. الايدا نۇرگۇل قاراعويشينا بۇگىنگى بريفينگتى مەملەكەتتىك تىلدە وتكىزۋ تۋرالى شەشىم قابىلداعاندارىن، سوندىقتان باسقا تىلدە سويلەۋگە ۇيالىپ وتىرعانىن ايتتى.
«ءبىز بريفينگتى ۇيىمداستىرار الدىندا باسپا ءسوز قىزمەتى ارقىلى ءبىر ماسەلە ايتىلۋى كەرەك بولعان. رۋحاني جاڭعىرۋ تاقىرىبىن قوزعاعاننان كەيىن، رۋحاني جاڭعىرىپ جاتقانىمىزدى دالەلدەۋىمىز كەرەك قوي. سول ءۇشىن بۇگىنگى شارانى، مۇمكىن وسى مەكەمەلەرىڭىزدە ءبىرىنشى رەت شىعار، مەملەكەتتىك تىلدە وتكىزەيىك دەپ شەشكەن ەدىك. وسىعان دەيىن ورىس تىلىندە وتكەن شارالاردى قازاق جۋرناليستەرى اۋدارىپ ءجۇردى، اۋدارىپ تا كەلەدى. ەندى بۇگىن سىزدەر قازاق تىلىنەن اۋدارىپ كورسەڭىزدەر دەگەن نيەت بولعان. ءبىراق ارىپتەستەرىم ورىس تىلىندە دە جاۋاپ بەرۋگە ىقىلاستى ەكەندىكتەرىن ايتتى. مەن بۇعان دەيىن ءتىل ماسەلەسىمەن اينالىسىپ جۇرگەندىكتەن، شىنىمدى ايتسام، حالىقتىڭ الدىندا باسقا تىلدە سويلەۋگە ۇيالىپ تۇرمىن»، - دەدى قاراعويشينا. دەسەك تە، بريفينگكە قاتىسقان باسقا سپيكەرلەر ورىس تىلىندە قويىلعان سۇراقتارعا سول تىلدە جاۋاپ بەردى.
«رۋحاني جاڭعىرۋ - پاتريوتيزم نەگىزى» ۆەدومستۆوارالىق رەسپۋبليكالىق بايقاۋى ق ر باس پروكۋراتۋراسىنىڭ باستاماسىمەن جانە پرەزيدەنت اكىمشىلىگىنىڭ، مادەنيەت جانە سپورت مينيسترلىگى تىلدەردى دامىتۋ جانە قوعامدىق-ساياسي جۇمىس كوميتەتىنىڭ قولداۋىمەن وتەدى.
بايقاۋعا باس پروكۋراتۋرا، ۇلتتىق قاۋىپسىزدىك كوميتەتى، ىشكى ىستەر مينيسترلىگى، قورعانىس مينيسترلىگى، مەملەكەتتىك قىزمەت ىستەرى جانە سىبايلاس جەمقورلىققا قارسى ءىس- قيمىل اگەنتتىگى، مەملەكەتتى كۇزەت قىزمەتى وكىلدەرىنەن قۇرىلعان 6 كوماندا قاتىسادى. كوماندالار 2 اينالىم بويىنشا سايىسقا تۇسەدى.
ءبىرىنشى اينالىمنىڭ ءوزى ەكى بولىمنەن تۇرادى - مەملەكەتتىك ورگاننىڭ قىزمەتى جانە رۋحاني جاڭعىرۋ اياسىندا اتقارىلىپ جاتقان ناقتى ىستەرگە نەگىزدەلگەن تانىستىرۋ مەن بەينەبايان. ەكىنشى اينالىم - «رۋحاني جاڭعىرۋ - پاتريوتيزم نەگىزى» اتتى ساحنالاندىرىلعان كورىنىستەن تۇرادى.
