حالىقتى باسپانا الاياقتارىنان قالاي قورعاۋعا بولادى

دەپ حابارلايدى قازاقپارات ءتىلشىسى.

«نەگىزى، نوتاريۋستار ءۇيدى ساتىپ جاتقان ادامنىڭ مەنشىك قۇقىعىن، ياعني بۇعان دەيىن باسپانا كىمنىڭ اتىندا بولعانىن جانە قالاي اۋدارىلعانىن تەكسەرا السا، وسى سالاداعى الاياقتى ارەكەتتەردى ازايتۋعا بولادى. ماسەلەن، ءۇيدى الاتىن ادام قوسىمشا اقى تولەپ، مەنشىك قۇقىعىن جان- جاقتى تەكسەرە الاتىنداي جاعداي جاساۋعا بولادى. الايدا ول ءۇشىن نوتاريۋستارعا ءتيىستى اقپاراتتىق جۇيلەرگە كىرۋگە، ودان قاجەتتى مالىمەت الۋعا رۇقسات بەرۋ كەرەك. سوسىن ناقتى ءبىر ۇيگە قاتىستى بارلىق قۇجاتتار ءبىرىڭعاي بازادا ساقتالۋى شارت. وسىنىڭ ارقاسىندا كەز كەلگەن نوتاريۋس جىلجىمايتىن مۇلىكتىڭ مەنشىك قۇقىعىن تەكسەرە الادى»، - دەدى ق ر باس پروكۋروردىڭ ورىنباسارى اندرەي لۋكين زاڭ- جوبالاۋ قىزمەتى بويىنشا ۆەدومستۆوارالىق كوميسسيانىڭ كەزەكتى وتىرىسىندا.

 ونىڭ ايتۋىنشا، بۇگىندە كەلىسىمشارتتى راسىمدەگەن نوتاريۋستىڭ جاۋاپكەرشىلىگى دە جوق ەمەس. ونىڭ ساقتاندىرۋ سوماسىنا 2 ميلليون تەڭگە مەن مۇلىك كىرەدى.

«بىزدىڭشە، الاياقتىق بولعان جاعدايدا ول سوما بارلىق شىعىنداردى وتەۋگە جەتكىلىكسىز. ماسەلەن، كورشى رەسەيدە بىرەۋ نوتاريۋستىڭ كەسىرىنەن مۇلىكتەن ايىرىلسا، وندا ساقتاندىرۋ كومپانياسى 5 ميلليون رۋبل تولەپ بەرەدى. ءبىزدىڭ اقشامەن 25 ميلليون تەڭگەدەي بولادى. بۇل - اجەپتاۋىر اقشا. قازاقستاندا بولسا، 12 ەسە تومەن، 2-اق ميلليون تەڭگە. وعان جاتاقحانا بولمەسىن دە ساتىپ الا المايسىڭ. دەمەك، ايماقتاردا وتىرعان نوتارياتتىق پالاتالار دا ءوز وكىلدەرىن ساقتاندىرۋعا اتسالىسۋى قاجەت»، - دەپ اتاپ كورسەتتى لۋكين.

 ايتا كەتكەن ءجون، رەسپۋبليكالىق نوتارياتتىق پالاتا اتالعان باستاماعا قارسى ەمەس. الايدا ەڭ الدىمەن اقپاراتتىق بازالاردى رەتكە كەلتىرۋ كەرەك. نوتاريۋستارعا مۇلىككە قاتىستى مالىمەتتەردى الۋعا رۇقسات بەرىلسە، ساقتاندىرۋ سوماسىن دا ۇلعايتۋعا ابدەن بولادى.

 اۆتور: ارمان اسقاروۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى