اسىق اتۋ ويىنى يۋنەسكو- نىڭ ماتەريالدىق ەمەس مۇرالار تىزىمىنە ەنەتىن بولدى

 «2016 -جىلى يۋنەسكو- نىڭ ماتەريالدىق ەمەس مۇرالارى جونىندەگى كوميتەتىنىڭ شەشىمىنە سايكەس، قازاق كۇرەسى جانە ساياتشىلىق ونەرى يۋنەسكو- نىڭ ماتەريالدىق ەمەس مادەني مۇراسىنىڭ رەپرەزەتانتيۆتىك تىزىمىنە ەنگەن بولاتىن. بۇگىنگى تاڭدا ۇلتتىق سپورت تۇرلەرىنىڭ ىشىندە اتالعان تىزىمگە اسىق اتۋ ويىنىن ەنگىزۋ ماسەلەسى كۇن تارتىبىندە تۇر. ۇستىمىزدەگى جىلدىڭ 4-9 جەلتوقسانى ارالىعىندا وڭتۇستىك كورەيا رەسپۋبليكاسىنىڭ چەدجۋ قالاسىندا ۇكىمەتارالىق ماتەريالدىق ەمەس مۇرالاردى قورعاۋ جونىندەگى كوميتەتىنىڭ 12 - سەسسياسى وتەدى. وسى سەسسيادا اتالعان تىزىمگە جاڭا ەلەمەنتتەردى ەنگىزۋ ماسەلەسى قارالادى» ، - دەيدى راۋحان توعىمبايەۆا.

ونىڭ ايتۋىنشا، قازاقستان تاراپىنان سەسسيا شەڭبەرىندە اسىق اتۋ ويىنىن وسى تىزىمگە ەنگىزۋ تۋرالى ءوتىنىم دايىندالعان. 3-6 - جەلتوقساندا سەسسيا اياسىندا ورتالىق ازيا ەلدەرىنىڭ ماتەريالدىق ەمەس مۇرالارىنىڭ تانىستىرىلىمىنا ارنالعان ازيا- تىنىق مۇحيت ارالىعىنداعى ماتەريالدىق ەمەس مادەني مۇرالار جونىندەگى حالىقارالىق جەلى ورتالىعىنىڭ كورمەسى وتەدى. «سول كورمەدە قازاقستان رەسپۋبليكاسىنىڭ ماتەريالدىق ەمەس مادەني مۇرالارىنا ارنالعان ءبولىم بولماق. سونىڭ اياسىندا ق ر مادەنيەت جانە سپورت مينيسترلىگىنىڭ ەكى وكىلى اسىق اتۋ ويىنىن ماتەريالدىق ەمەس مادەني مۇرالاردىڭ قاتارىنا قوسۋ ءۇشىن قورعاۋعا بارادى» ، - دەيدى راۋحان توعىمبايەۆا. ايتا كەتسەك، قازاقستاندا ۇلتتىق سپورت تۇرلەرى بوينىشا 7 مامانداندىرىلعان كلۋب جانە 9 مامانداندىرىلعان سپورت مەكتەبى جۇمىس ىستەيدى.

اۆتور: ايان بەكەن ۇلى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى