يپوتەكا بەرەتىن بانكتەر وزدەرىن عانا ويلايدى - زاۋرەش بايمولدينا

بۇگىندە يپوتەكالىك نەسيەلەر نارىعىندا ساقتاندىرۋ جۇيەسى بار بولسا دا، كوپ جاعدايدا، ونداي جۇيە ءبىرجاقتى، ياعني ۇلەسكەرلەر ءۇشىن ەمەس، بانكتەر ءۇشىن ءتيىمدى، دەپ حابارلايدى قازاقپارات ءتىلشىسى.

«يپوتەكالىق زايم تۋرالى كەلىسىمشارت جاسالعاندا بارلىعى بانكتەرگە، ءتىپتى ساقتاندىرۋ تولەمدەرى دە سولارعا بەرىلەدى. سوندا ول ەرىكتى تۇردە ەمەس، مىندەتتى شارا بولىپ سانالادى. امال جوق، نەسيە العاننان كەيىن ادام كەلىسۋگە ءماجبۇر. ماسەلەن، «بەسوبانى» (قاراعاندىدا قۇلاپ قالعان ءۇي - اۆت.) الايىقشى، سول كەزدە بارلىق ساقتاندىرۋ تولەمدەرىن بانك الدى.

ال حالىققا بيۋدجەتتىڭ ەسەبىنەن وتەماقى بەرىلدى. بۇنىڭ ءوزى يپوتەكالىق نەسيەلەندىرۋ نارىعىنداعى ساقتاندىرۋ جۇيەسىنىڭ دۇرىس جولعا قويىلماعانىن كورسەتسە كەرەك»، - دەدى ق ر ادىلەت ۆيتسە-ءمينيسترى زاۋرەش بايمولدينا زاڭ-جوبالاۋ قىزمەتى بويىنشا ۆەدومستۆوارالىق كوميسسيانىڭ بۇگىنگى وتىرىسىندا.

ونىڭ ايتۋىنشا، ەلىمىزدە ەرىكتى ساقتاندىرۋ جۇيەسىن دامىتقان ماڭىزدى. سوندا عانا حالىقتىڭ مەنشىك قۇقىعى قورعالادى. الايدا ادامنىڭ مەنشىك قۇقىعىن تولىعىمەن قورعاۋ ءۇشىن جىلجىمايتىن مۇلىكتىڭ كىمگە، قالاي جانە قاشان ساتىلعانى تۋرالى تولىق اقپارات بولۋى شارت.

اقپاراتتىق جۇيەلەردى ينتەگراتسيالاپ، ءبىر-بىرىنە قوسۋ قاجەت. «ونسىز حالىقتى ەرىكتى ساقتاندىرۋ جۇيەسىنە ۇندەۋ ەرتە. بۇل - ناقتى زەرتتەۋدىڭ ناتيجەسى»، - دەپ اتاپ كورسەتتى ۆيتسە-مينيستر.

اۆتور: ارمان اسقاروۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى